ایڈیلیڈ (سپورٹس رپورٹر) پاکستانی کرکٹ ٹیم کے طویل قامت فاسٹ بولر محمد عرفان ایک مرتبہ پھر کولھے میں تکلیف میں مبتلا ہو گئے ہیں اور اتوار کے روز آئرلینڈ کے خلاف میچ میں ان کی شرکت یقینی نہیں۔محمد عرفان نے ہفتے کے روز ٹیم پریکٹس میں حصہ لیا تھا تاہم وہ کافی دنوں سے مکمل فٹ نہ ہونے کے سبب ٹریننگ کے دوران چند ہی اوور کرا پائے ہیں۔آئرلینڈ کے خلاف میچ سے قبل عرفان کی فٹنس کا جائزہ لیا جائے گا اور اگر فٹ نہ ہوئے تو وکٹ دیکھتے ہوئے احسان عادل یا یاسر شاہ کو ٹیم میں شامل کیا جائے گا۔یاسر شاہ بھارت کے خلاف کھیلے تھے لیکن احسان عادل اب تک اس عالمی کپ میں کوئی میچ نہیں کھیلے ہیں۔ عمر اکمل کی جگہ حارث سہیل کو آئر لینڈ کےخلاف کھلائے جانے کا امکان ہے۔