ڈکیتیاں مزاحمت پر ٹوبہ پسرور میں2قتل لاہور بہاولپور مقابلے 2ڈاکو ہلاک

لاہور‘ ٹوبہ ٹیک سنگھ‘ پسرور‘ بہاولپور (نامہ نگار+ علاقائی نمائندوں سے) ڈکیتی کی وارداتوں کے دوران گزشتہ روز مزاحمت پر ٹوبہ ٹیک سنگھ، پسرور میں 2 افراد کو قتل‘ لاہور قصور پورہ میں خاتون کو زخمی کر دیا گیا۔ دوسری جانب لاہور میں واردات کے بعد فرار ایک ڈاکو ڈولفن اہلکاروں‘ بہاولپور میں ڈکیت اپنے ساتھی کے ہاتھوں مارا گیا۔ دیگر متعدد وارداتوں میں شہری مال و زر سے محروم ہو گئے۔ لاہور سے نامہ نگار کے مطابق 3 ڈاکو قصور پورہ میں ڈکیتی کی واردات کے دوران فرار ہو رہے تھے۔ شفیق آباد ڈولفن  پولیس کے اہلکاروں نے ان کا تعاقب کیا تو تینوں ڈاکو مالی پورہ بند روڈ میں واقع ایک میٹریل سٹور میں گھس گئے اور پولیس پر فائرنگ کر دی۔ جوابی فائرنگ کے نتیجے میں ایک ڈاکو ہلاک ہو گیا۔ دو ساتھی گرفتار کر لئے گئے۔ ہلاک ڈاکو کی شناخت ننکانہ صاحب کے رہائشی آصف علی کے نام سے ہوئی ہے۔ دوسری طرف گرین ٹاؤن میں دو خواتین ڈاکوؤں نے سعید کے گھر میں گھس کر اس کی والدہ عشرت کو چھریوں کے وار سے زخمی کر دیا اور سات تولے طلائی زیورات ، 22لاکھ کے سرٹیفکیٹ اور 50 ہزار لوٹ کر فرار ہو گئیں۔ نواب ٹاؤن میں ڈاکوؤں نے ضیاء مسعود کے زیر تعمیر گھر سے 25  لاکھ روپے مالیت کی نقدی اور سامان، شاہدرہ میں سلمان اور فیملی سے 6لاکھ 17ہزارروپے مالیت کے طلائی زیورات، نقدی اور موبائل فون، وحدت کالونی میں حمزہ سے 2 لاکھ 26 ہزار روپے موبائل فون اور کیمرا، ہربنس پورہ میں محمد وقاص کی دکان سے 1لاکھ 32ہزار روپے ، لٹن روڈ کے علاقے میں عمیر احمد کی بیوی سے گھر کی دہلیز پر 29ہزار روپے، موبائل فون اور لیپ ٹاپ، غالب مارکیٹ کے علاقے میں خاتون ڈاکو نے گاڑی میں لفٹ لے کر کار سوار خرم شہزاد سے اسلحہ کے زور پر 1لاکھ 63ہزار روپے، بھاٹی گیٹ کے علاقے میں ڈاکوؤں نے محمد ریحان سے 1لاکھ 30 ہزار روپے اور موبائل فون چھین لئے۔ اقبال ٹاؤن میں ڈاکوؤں نے فہد بلال کو اسلحہ کے زور پر بینک لے جا کر اے ٹی ایم سے 35ہزار نقدی نکلوا لی۔ گلشن راوی میں سید عبدالوہاب سے 29 ہزار روپے، سبزہ زار میں نزاکت کی فارمیسی سے 22ہزار روپے لوٹ لئے۔ چوروں نے نواب ٹاؤن  سے سعید حسن، ہنجر وال سے امجد کی گاڑیاں، گجر پورہ سے نصیر احمد کا رکشہ، وحدت کالونی سے عمران کا رکشہ، جنوبی چھاؤنی میں عمران احمد، قلعہ گجر سنگھ میںسے حیدر خان ، مزنگ سے احمد علی ، لٹن روڈ سے اختر، نصیرآباد سے علی حیدر، غالب مارکیٹ سے حسنین آصف ،، رنگ محل سے زمان حسن کی 7 موٹر سائیکلیں چوری کر لی ہیں۔ ٹوبہ ٹیک سنگھ سے نمائندہ خصوصی + نامہ نگاران کے مطابق ڈکیتی مزاحمت پر فائرنگ سے 30 سالہ نوجوان محمد شکیل کو قتل کر دیا گیا۔ سیالکوٹ + پسرور سے نامہ نگاران کے مطابق پسرور کے گاؤں کھچیاں بھٹیاں میں ڈاکوؤں کی مبینہ فائرنگ سے باپ اسد جاں بحق جبکہ اٹھارہ سالہ بیٹا ایزد شدید زخمی ہو گیا۔ بہاولپور سے نامہ نگار کے مطابق تھانہ سمہ سٹہ کے علاقہ موضع پکا باڑہ میں مبینہ پولیس مقابلے کے دوران نامعلوم ڈاکو اپنے ہی ساتھیوں کی فائرنگ سے ہلاک ہو گیا۔ ملزم موٹر سائیکل چھین کر فرار ہو رہے تھے۔ پولیس نے تعاقب کیا‘ فائرنگ کے تبادلے کے بعد ایک ڈاکو کی نعش برآمد کر لی۔علاوہ ازیں کوٹ خواجہ سعید لاہور کے علاقہ شمس آباد میں خاتون نے نامعلوم لڑکوں کے ہمراہ گھر پر دھاوا بولا اور 41 ہزار روپے لے گئی۔ خاتون نے مردوں کے ہمراہ خواتین پر بھی تشدد کیا۔