لاہور(سپورٹس رپورٹر)پاکستان سپر لیگ 9 کے کوالیفائر میں ملتان سلطانز پشاور زلمی کو7وکٹوں سے ہراکر فائنل میں پہنچ گئی ۔نیشنل سٹیڈیم کراچی میں کھیلے گئے میچ میں پشاور زلمی کے کپتان بابر اعظم نے ٹاس جیت کر بیٹنگ کا فیصلہ کیا اور 7وکٹوںپر 146رنز بنائے۔ بابر اعظم 46 رنز بناکر نمایاں رہے۔ کیڈمور نے 24، محمد حارث نے 22، صائم ایوب ایک، حسیب اللہ 3، رومین پاؤل 12 رنز بناکر آؤٹ ہوئے۔ پال والٹر اور لوک ووڈ 14، 14 رنز بناکر ناٹ آؤٹ رہے۔ کرس جارڈن اور اسامہ میر نے 2،2 وکٹیں حاصل کیں۔ڈیوڈ ولی، محمد علی اور عباس آفریدی نے ایک ایک کھلاڑی کو آؤٹ کیا۔ملتان سلطانز نے ہدف 3وکٹوںپر پورا کرلیا ۔ یاسر خان 54‘محمد رضوان 15‘جانسن چارلس 11رنز بناکر آئوٹ ہوئے ۔ عثمان خان36اور افتخار احمد22رنز بناکر ناقابل شکست رہے ۔ مہران ممتاز‘عامر جمال اور سلمان ارشاد نے ایک ایک کھلاڑی کو آئوٹ کیا ۔  ملتان سلطانز کی ٹیم میںطیب طاہر کی جگہ خوشدل شاہ کو ٹیم میں شامل کیا گیا۔ پشاور زلمی کی ٹیم میں نوین الحق اور ایمل خان کی جگہ پال والٹر اور سلمان ارشاد کو ٹیم کا حصہ بنایا گیا ۔پشاور زلمی کوئٹہ گلیڈی ایٹر ز اور اسلام آباد یونائٹیڈ کے درمیان میچ کی فاتح ٹیم سے فائنل کیلئے مقابلہ کریگی ۔