لاہور ریجن کے2 زونز کے ٹرائلز مکمل 750کھلاڑیوں کی شرکت 

لاہور (سپورٹس رپورٹر)پی سی بی سینئر انٹر ڈسٹرکٹ کرکٹ ٹورنامنٹ کیلئے لاہور ریجن کے دو زونز کے ٹرائلز مکمل ہوگئے جبکہ لاہور ایسٹ زون کرکٹ ایسوسی ایشن کے ٹرائلز آج ایل سی سی اے گراونڈ پر ہونگے۔اب تک لاہور ویسٹ زون اور نارتھ زون کرکٹ ایسوسی ایشنز کے ٹرائلز میں ساڑھے سات سو کھلاڑیوں نے شرکت کی۔لاہور ایسٹ زون کرکٹ ایسوسی ایشن کے ٹرائلز کیلئے کلبز نے تین سو سے زائد کھلاڑیوں کے نام بھجوائے ہیں ۔ ٹرائلز میں 140 بیٹرز ،76 فاسٹ باﺅلرز،45 سپنرز،25 وکٹ کیپرز اور 29 آل راونڈرز حصہ لیں گے۔ لاہور ریجن کے ہیڈ کوچ جاوید حیات اور سابق فرسٹ کلاس کرکٹر آصف اشفاق ٹرائلز کی نگرانی کریں گے۔ ایسٹ زون کے صدر بلال مقیت نے ٹرائلز کو احسن انداز میں کروانے کیلئے چار کو آرڈی نیٹرز محمد خورشید، منیر احمد ، منور جاوید اور محمد اسلام کو تعینات کیا ہے۔ ٹرائلز کے بعد 12 ، 12 کھلاڑیوں پر مشتمل آٹھ ٹیمیں تشکیل دی جائیں گی ۔ صدر لاہور ریجن خواجہ ندیم احمد اور زونل عہدیداران ٹرائلز کی مانیٹرنگ کررہے ہیں۔چار سال بعد ریجنل کرکٹ کی بحالی کے بعد شہر بھر سے ایک ہزار سے زائد کرکٹرز ٹرائلز میں شرکت پر کرکٹ آرگنائزرز نے اطمینان کا اظہار کیا ہے۔