شیخوقپورہ: نجی سکول کی چھت گر گئی، ملبے تلے دب کرایک طالبعلم جاں بحق، 5 زخمی

شیخوپورہ + لاہور (نامہ نگار خصوصی + خبرنگار) سرگودھا روڈ کی آبادی ماچھیکے میں ایک نجی تعلیمی ادارے کے کمرہ کی چھت گرنے سے دوسری جماعت کا طالبعلم علی شیر ملبے تلے دب کر جاں بحق جبکہ پانچ طالب علم زخمی ہوگئے، جنہیں اساتذہ اور دیگر افراد نے اپنی مدد آپ کے تحت ملبے سے نکالا تاہم پولیس نے اس سلسلہ میں سکول انتظامیہ کے خلاف کوئی کاروائی نہیں کی۔ ذرائع کے مطابق شیخوپورہ میں بوسیدہ عمارتوں میں سکول چلانے کی پابندی کے احکامات پر کوئی عملدر آمد نہیں ہورہا، ایک سروے میں 100 سے زائد سکولوں کی عمارتوں کو خطرناک قرار دئے جانے کے باوجود ان میں تدریس جاری ہے۔علاوہ ازیں وزیراعلیٰ پنجاب محمد شہباز شریف نے شیخوپورہ کے علاقے ماچھیکے میں نجی سکول کی چھت گرنے کے واقعہ کا نوٹس لیتے ہوئے سیکرٹری سکولز ایجوکیشن اورڈی سی او شیخوپورہ سے رپورٹ طلب کرلی ہے ۔وزیراعلیٰ نے واقعہ کی تحقیقات کا حکم دیتے ہوئے ایک بچے کے جاںبحق ہونے پردکھ اور افسوس کا اظہار کیاہے ۔