لاہور(سپورٹس رپورٹر+نمائندہ سپورٹس)سٹار بلے باز فخر زمان نے لاہور قلندرز کے شائقین سے وعدہ کیا ہے کہ اس ایڈیشن میں قلندرز کی ٹیم انہیں مایوس نہیں کریگی۔ خوشی ہے کہ لاہور قلندرز کا حصہ ہیں۔ لاہور قلندرز نے پاکستان سپر لیگ میں کوئی ٹائَٹل تو نہیں جیتا لیکن قلندرز نے گراس روٹ پر جو کام کیا ہے اس کی دنیا میں کہیں مثال نہیں ملتی اور اس کام کی وجہ سے لاہور قلندرز نے لاکھوں دل بھی جیتے ہیں۔فاسٹ بائولر شاہین شاہ آفریدی کا کہنا ہے کہ لاہور قلندرز کیلئے کھیلنے کے بعد ہی ان کا انٹرنیشنل ڈبیو ہوا جبکہ نیوزی لینڈ کے کھلاڑی اینٹون ڈیوکیچ کا کہنا ہے کہ انہیں لاہور قلندرز کا حصہ ہونے پر فخر ہے۔لاہور قلندرز کا ایمبسیڈر مقرر ہونے کے بعد شاہین شاہ آفریدی نے وڈیو پیغام میں کہا کہ لاہور قلندرز میں کھیل کر انہیں بہت فائدہ ہوا، قلندرز نے انہیں پاکستان سپر لیگ میں پرفارم کرنے کا موقع دیا جس کے بعد ا ن کو قومی ٹیم میں منتخب کیا گیا۔ یاسر شاہ نے بھی ٹیم کی جانب سے گولڈ کیٹیگری میں برقرار رہنے پر خوشی کا اظہار کیا ہے۔نیوزی لینڈ کے کرکٹر اینٹون ڈیوکیچ نے کہا کہ لاہور قلندرز کی ٹیم نے پی ایس ایل میں بہت سے دل ضرور جیتے ہیں۔ وہ اس فرنچائز کا حصہ ہونے پر فخر محسوس کرتے ہیں۔