وسیم اکرم نیشنل کرکٹ اکیڈمی کی سہولیات سے مایوس 

لاہور(سپورٹس رپورٹر)پاکستان کے سابق کپتان وسیم اکرم کا نیشنل کرکٹ اکیڈمی اور اس میں موجود جم کی سہولیات کے بارے میںکہا ہے کہ وہ ہمارے کھلاڑیوں کو فراہم کی جانے والی سہولیات سے مایوس ہیں۔انہوں نے کہا کہ انہیں آسٹریلیا کے ایک کلب نے مدعو کیا تھا اور وہ ایک فٹبال کلب تھا، انہوں نے وہاں گراؤنڈ کے اندر ان کا جم اور سوئمنگ پول دیکھا جہاں وہ پریکٹس کرتے ہیں۔ وہ جم اس دنیا سے باہر کا لگتا تھا اور (این سی اے) کا موجودہ جم میرے دور والا ہی ہے تاہم اس کی تزئین و آرائش کی گئی ہے اور صرف چند ڈمبلز شامل کیے گئے ہیں اور وہ بھی صرف ایک ایک سیٹ۔جب آپ ڈمبلز خریدتے ہیں، تو آپ ہر جوڑے کے دو یا تین سیٹ خریدتے ہیں کیونکہ جب ٹیم پریکٹس کیلئے آتی ہے تو ایک آدمی کا پریکٹس سیشن ختم ہونے کا انتظار کرنے کے بجائے ایک وقت میں زیادہ لوگ انہیں استعمال کر سکتے ہیں۔لہذا ہمارے پاس اب بھی 2001ء کی پرانی مشینیں نصب ہیں اوران سہولیات کے مقابلے میں آپ یہ دیکھیں کہ ہم کرکٹ سے کتنا کماتے ہیں۔