سندھ انٹر سکول کرکٹ ٹورنامنٹ، جی بی ایچ ایس ٹنڈو محمد خان سکول فائنل میں

کراچی(اے پی پی)سندھ انٹر سکول کرکٹ ٹورنامنٹ میں جی بی ایچ ایس ٹنڈو محمد خان سکول اورجی بی ایچ ایس سعید پور سکول فائنل میں پہنچ گئیں۔ علی اعظم اور عبدالرزاق سینئر مین آف دی میچ رہے۔  سندہ کرکٹ ایسوسی ایشن کے زیر اہتمام اور حکومت سندھ کے تعاون سے جاری سندھ انٹر سکول کرکٹ ٹورنامنٹ ٹنڈو محمد خان ڈسٹرکٹ میں کھیلے گئے پہلے سیمی فائنل میں جی بی ایچ ایس ٹنڈو محمد خان سکول نے جی بی ایچ ایس راجو نظامانی سکول کو 112 رنز سے شکست دے دی۔ جی بی ایچ ایس ٹنڈو محمد خان سکول نے 182رنز بنائے۔ حسن علی بھٹی نے 63 اورعلی اعظم نے 38رنز سکور کئے۔ عبدل حامد نے 49 رنز کے عوض 4 کھلاڑیوں کو آئوٹ کیا جبکہ حسنین اور یاسر نے دو ،دو وکٹیں حاصل کیں۔ جواب میں جی بی ایچ ایس راجو نظامانی کی ٹیم 70رنز بناسکی۔ معاذ علی نے 28رنز سکورکئے۔ تنویر علی نے 3 جبکہ ایم محسن اور علی اعظم نے دو ،دوکھلاڑیوں کو آئوٹ کیا۔ علی اعظم مین آف دی میچ قرارپائے۔ دوسرے سیمی فائنل میں جی بی ایچ ایس سعید پور سکول نے جی بی ایچ ایس ملا کاتھیار سکول کو 8وکٹوں سے مات دے دی۔ جی بی ایچ ایس ملا کاتھیار سکول کی ٹیم 136رنز بناکر آئوٹ ہوگئی۔ غلام فرید 26 اور عزیر علی 21رنز کے ساتھ نمایاں رہے۔ جواب میں فاتح ٹیم نے ہدف دو وکٹوں پر حاصل کر لیا۔ ایاز علی نے 49 رنز بنائے جبکہ عبدلرزاق سینئر 36رنز بناکر ناٹ آئوٹ رہے۔ عبدل رزاق سینئر مین آف دی میچ رہے۔