لاہور(نمائندہ اسپورٹس) جونئیر سلیکشن کمیٹی کے سربراہ باسط علی کا کہنا ہے کہ ہمیشہ پلئیرز کا انتخاب میرٹ پر کرتا ہوں لاہور میں انڈر سکسٹین ٹیم کی سلیکشن میں بھی کھلاڑیوں کا انتخاب میرٹ پر کیا ہے جو حقدار اور باصلاحیت ہو گا اسے منتخب کرونگا جونئیر سطح پر ٹیم کا انتخاب نسبتا مشکل کام ہے نہ کبھی دباو میں آیا ہوں نہ سفارش سنتا ہوں۔ وہ وقت نیوز کے پروگرام گیم بیٹ میں گفتگو کر رہے تھے۔والدین کے نزدیک انکا بچہ سب سے اچھا ہوتا ہے جہاں بھی جاوں ایمانداری سے کام کرتا ہوں۔کوئی پلئیر اوور ایج نکل آئے تو اس میں سلیکشن کمیٹی کا کوئی قصور نہیں ہوتا۔ انجانے میں غلطی ہو سکتی ہے لیکن جان بوجھ کر کسی باصلاحیت پلئیر کو کرکٹ سے دور نہیں کر سکتا۔ لاہور ریجنل کرکٹ ایسوسی ایشن کے صدر شاریز خان روکھڑی کا کہنا ہے کہ ہمارے جونئیر سلیکشن کمیٹی کے ساتھ کسی قسم کے اختلافات نہیں ہیں ہمیں سلیکشن پر کوئی اعتراض نہیں اور انڈر سکسٹین پلئیرز کے انتخاب میں جونئیر سلیکشن کمیٹی کے سربراہ کے حوالے شائع ہونیوالی تمام خبریں بیبنیاد ہیں ہم انکوائری کر رہے ہیں کہ ایسوسی ایشن کے کس عہدیدار نے یہ غلط خبریں پھیلائی ہیں۔