ملکی کوچ کیساتھ کمیونی کیشن کا مسئلہ نہیں ہوتا: یاسر شاہ

لاہور(نمائندہ سپورٹس )پاکستان کرکٹ ٹیم کے لیگ سپنر یاسر شاہ نے کہا ہے کہ وہ غیرملکی کے بجائے ملکی کوچ کے ساتھ کام کرنے کو بہتر سمجھتے ہیں، کیوں کہ پاکستانی کوچ کے ساتھ پلیئرز کو اپنی بات کہنے یا کوچ کی بات سمجھنے میں کوئی مسئلہ نہیں پیش آتا۔ غیر ملکی کوچ کیساتھ کام کرتے ہوئے پلیئرز کو کمیونیکشن کا مسئلہ ہمیشہ رہتا ہے۔ کبھی کھلاڑی کوچ کی بات نہیں سمجھ سکتے اور کبھی کوچ کھلاڑیوں کا مسئلہ نہیں سمجھ پاتے۔ وہ ذاتی طور پر پاکستانی کوچ کے ساتھ کام کرنا مناسب سمجھتے ہیں۔ انہیں وقار یونس اور مشتاق احمد نے ہمیشہ بہت سپورٹ کیا۔ وہ خوش قسمت تھے کہ انہیں عبدالقادر سے سیکھنے کا موقع ملا، وہ لیگ سپن کی دنیا میں ایک بڑا نام تھے، آنے والے بولرز ایک اچھے استاد سے محروم ہوگئے ہیں۔وہ جو بھی فارمیٹ کھیلتے ہیں ان کی کوشش ہوتی ہے کہ بہتر سے بہتر دیں، لیکن وائٹ بال کرکٹ سے ان کی پرفارمنس زیادہ بہتر نہیں۔ورلڈ ٹیسٹ چیمپئن شپ میں پاکستان سے اچھی کارکردگی کی توقع رکھتے ہوئے یاسر شاہ بولے کہ دبئی کی کنڈیشنز میں سپنرز اہم رول ادا کریں گے لیکن آسٹریلیا میں پاکستان کو جیت کے لیے جارح مزاجی کا مظاہرہ کرنا ہوگا۔