پاک بحریہ کے جہاز پی این ایس عالمگیر کا صلالہ بندرگاہ کا دورہ، پرتپاک استقبال

اسلام آباد(صباح نیوز)پاک بحریہ کے جہاز پی این ایس عالمگیر نے عمان کی بندرگاہ صلالہ کا دورہ کیا ہے۔ترجمان پاک بحریہ کے مطابق پی این ایس عالمگیر بحیرہ عرب میں ریجنل میری ٹائم سکیورٹی پٹرول کے ضمن میں تعینات ہے۔صلالہ بندرگاہ آمد پر پاک بحریہ کے جہاز کا پر تپاک استقبال کیا گیا۔ ترجمان پاک بحریہ کے مطابق کمانڈنگ آفیسر پی این ایس عالمگیر نے سدرن نیول کمانڈر اور ڈپٹی کمانڈر 11انفنٹری بریگیڈ سے ملاقاتیں کیں، ملاقاتوں کے دوران باہمی دلچسپی کے امور بشمول دونوں ممالک کے مابین بحری اشتراک پر تبادلہ خیال کیا گیا۔دورے کے آخری مرحلے میں پی این ایس عالمگیر اور عمانی بحریہ کے جہاز کے درمیان باہمی مشقوں کا انعقاد بھی کیا گیا،دورے کے اختتام پر پی این ایس عالمگیر نے بحیرہ عرب میں ریجنل میری ٹائم سکیورٹی پٹرول کا دوبارہ آغاز کردیا ہے۔ترجمان پا ک بحریہ کا کہنا ہے کہ جہاز کا یہ دورہ دونوں ممالک کی بحری افواج کے مابین مضبوط دوستانہ تعلقات کے فروغ کا باعث بنے گا۔