اے این ایف کی کارروائیاں، 2کروڑ روپے کی منشیات برآمد‘6ملزم گرفتار

لا ہو ر (سٹاف رپورٹر) اینٹی نارکوٹک فورس نے مختلف کارروائیوں میں 2کروڑ روپے سے زائد کی منشیات برآمد کرلی۔ گزشتہ 24گھنٹوں کے دوران مختلف کارروائیوں میں 2کروڑ روپے سے زائد مالیت کی 28کلو منشیات برآمد کرکے 6ملزمان کو گرفتار کرلیا گیا۔پشاور میں یونیورسٹی کے قریب کار سوار ملزم سے 15کلو چرس برآمد ہوئی جبکہ سہراب گوٹھ کراچی میں ملزم سے ایکسٹیسی کی 570گولیاں برآمد کی گئیں۔ کوئٹہ میں یونیورسٹی کے قریب موجود ملزم سے 4کلو آئس برآمد ہوئی۔ قراقرم ہائی وے مانسہرہ پر گاڑی کی تلاشی کے دوران 3کلو سے زائد منشیات برآمد کرکے ملزم کو گرفتار کرلیا گیا۔ اسلام آباد میں مارگلہ روڈ پر موٹرسائیکل سوار کے بیگ سے 8کلو سے زائد چرس برآمد ہوئی۔ڈی جی خان میں ٹانمی موڑ کے قریب ملزم سے 1کلوگرام آئس برآمد کی گئی جبکہ جناح انٹرنیشنل ایئرپورٹ کراچی پر کوریئر آفس میں بحرین بھیجے جانیوالے پارسل سے 400 گرام آئس برآمد ہوئی۔بلوچستان میں چاغی میں پاک افغان سرحد کے قریب غیر آباد علاقے میں چھپائی گئی 10.2کلو گرام ہیروئن برآمد کرلی گئی۔