اسلام آباد(نمائندہ خصوصی)پاکستان ٹیکنالوجی کے شعبے میں سرمایہ کاری کرکے اپنے "میڈ ان پاکستان" اقدام کو مضبوط بنا سکتا ہے،  اسسٹنٹ ڈائریکٹر ٹریڈ ڈویلپمنٹ اتھارٹی آف پاکستان نذیر علی نے ویلتھ پاک کو بتایاکہ ٹیک سیکٹر میں سرمایہ کاری سے ملک کا درآمدات پر انحصار کم ہو گا، ملازمتیں پیدا ہوں گی، اور خود انحصاری اور اختراع کی حوصلہ افزائی ہو گی۔ہائی ٹیک مصنوعات، جیسے الیکٹرانکس، مشینری، طبی آلات، اور قابل تجدید توانائی کی ٹیکنالوجی کی ضرورت روز بروز بڑھتی جارہی ہے۔ ملک اپنی داخلی طلب کو پورا کر سکتا ہے، تجارتی توازن کو بڑھا سکتا ہے، اور مقامی پیداوار کو فروغ دے کر اپنی معاشی پوزیشن کو مضبوط کر سکتا ہے۔انہوں نے اس بات پر روشنی ڈالی کہ ڈیجیٹل پاکستان اقدام جیسے پروگراموں کے ذریعے، جس کا مقصد کنیکٹیویٹی کو بہتر بنانا، ڈیجیٹل مہارتوں کو بڑھانا اور جدت کو فروغ دینا ہے، حکومت نے پہلے ہی اس وژن کے لیے اپنی وابستگی کا مظاہرہ کیا ہے۔