کراچی (نیٹ نیوز) آئی سی سی کے صدر ہارون لورگٹ نے کہا ہے کہ پاکستان کرکٹ کو درپیش مسائل ہمارے کنٹرول سے باہر ہیں، پاکستان ٹی ٹوئنٹی کرکٹ کی بہترین ٹیم ہے۔ امید ہے کہ شاہد آفریدی کی زیر قیادت یہ ٹیم ٹائٹل کے دفاع میں کامیاب رہے گی۔ ان خیالات کا اظہار انہوں نے کراچی میں چیئرمین پی سی بی اعجاز بٹ اور قومی کرکٹ ٹیم کے کپتان شاہد آفریدی کے ساتھ ٹی ٹونٹی ورلڈ کپ ٹرافی کی تقریب رونمائی کے موقع پر میڈیا سے خطاب کرتے ہوئے کہی۔ ان کا کہنا تھا کہ پاکستان ٹیم شاہد آفریدی جیسے تجربہ کار کھلاڑی کی قیادت میں کھیلے گی جو کہ ٹی 20 کرکٹ کے بہترین کھلاڑی ہیں۔ ویسٹ انڈیز میں ٹی 20 ورلڈ کپ کا انعقاد یادگار ہوگا، ویسٹ انڈیز کی رنگا رنگ ثقافت سے مہمان ٹیمیں لطف اندوز ہونگی۔ اس ایونٹ میں ایشیا سے پانچ ٹیموں کی شرکت خوش آئند ہے۔ ہارون لورگٹ نے کہاکہ پاکستان آنے کا تجربہ ہمیشہ اچھا رہا ہے۔ اس سے قبل چیئرمین پی سی بی نے انہیں خوش آمدید کہتے ہوئے کہا کہ ٹی ٹوئنٹی کرکٹ میں پاکستان کی کارکردگی اچھی رہی ہے۔ 20 ٹوئنٹی ورلڈ کپ چیلنج ہے۔ شاہد آفریدی نے میڈیا سے گفتگو کرتے ہوئے کہاکہ ٹی ٹوئنٹی فارمیٹ ایشیائی ٹیمیں زیادہ بہتر سمجھتی ہیں۔ ورلڈ کپ چیلنج ہے۔ بھرپور محنت کرنا ہوگی یکجا ہو کر کھیلے تو ٹائٹل کا دفاع کرلیں گے۔