نیشنل سینئرز کرکٹ کپ:سرگودھا سینئرز کو گولڈن ایگلز کے ہاتھوں شکست

لاہور ( سپورٹس رپورٹر) بیسویں نیشنل سینئرز کرکٹ کپ کے کوارٹر فائنل میں گولڈن ایگلز نے سرگودھا سینئرز کو 7 وکٹوں سے شکست دے کر سیمی فائنل کیلئے کوالیفائی کرلیا۔ علی گڑھ کرکٹ گرائونڈ پر گولڈن ایگلز کے کپتان سلمان خان نے ٹاس جیت کر مخالف ٹیم کو پہلے کھیلنے کی دعوت دی۔ سرگودھا سینئرز نے 25.5 اوورز میں تمام کھلاڑیوں کے نقصان پر 142 رنز بنائے۔ محمد نواز نے 34، سلمان شاہد نے 28رنز بنائے۔ گولڈن ایگلز کی جانب سے محمد ریحان نے تین،رئوف وائیں ، ظہیر کالیہ نے دو، دو اور ڈاکٹر افضال نے ایک وکٹ حاصل کی۔ جواب میں گولڈن ایگلز نے 18.2 اوورز میں 3 کھلاڑیوں کے نقصان پر مطلوبہ سکور پوراکرلیا۔ کپتان محمد سلمان خان نے 57 ، شاہد انور 35 اور سلیم الہٰی نے 39 رنز ناٹ آئوٹ بنائے۔ سرگودھا سینئر زکی طرف سے توصیف عباس نے دو جبکہ اعجاز محمود نے ایک وکٹ حاصل کیں۔