آسٹریلوی ٹیم نے پاکستان میں خوب انجوائے کیا، بابر اعظم

لاہور(آئی این پی)پاکستان کرکٹ ٹیم کے کپتان بابر اعظم  نے کہا ہے کہ شاہین شاہ آفریدی ہر فارمیٹ کے ٹاپ ٹین بولرز میں آنے کے حقدار ہیں، وہ جس طرح محنت کرتے ہیں اور پرفارمنس دیتے ہیں انہیں تو مزید آگے جانا ہے۔لاہور میں میڈیا سے گفتگو کرتے ہوئے بابر اعظم کا کہنا تھا کہ آسٹریلیا کا دورہ شاندار رہا، یہ خوش آئند بات ہے کہ اب دوسری ٹیمیں بھی پاکستان آئیں گی، آسٹریلیا کے خلاف سیریز میں تینوں فارمیٹ میں اچھی کرکٹ ہو ئی، سب سے اچھی بات یہ تھی کہ آسٹریلیا کی ٹیم نے پاکستان میں خوب انجوائے کیا، انہوں نے کرکٹ کو بھی انجوائے کیا اور میدان سے باہر بھی لطف اندوز ہو تے رہے۔بابر اعظم نے کہا کہ اچھی چیز ہے کہ اس وقت قومی کرکٹرز کائونٹی کرکٹ کھیل رہے ہیں، میں نے کائونٹی کرکٹ میں فور ڈے کرکٹ تو نہیں کھیلا لیکن میں نے ٹی ٹوئنٹی کرکٹ کھیلی ہو ئی ہے، میں سمجھتا ہوں کہ کائونٹی کرکٹ کھیلنے سے کھیل میں بہتری آتی ہے۔