لاہور(سپورٹس ڈیسک )انگلینڈ کی ٹیسٹ ٹیم کے کپتان جو روٹ نے عہدے سے سبکدوش ہونے کا اعلان کر دیا۔انگلینڈ کی ٹیم ویسٹ انڈیز کیخلاف ٹیسٹ سیریز میں ناقص کارکردگی کے باعث شکست سے دوچار ہوگئی تھی، اسی بناء پر جو روٹ نے ٹیسٹ ٹیم کی کپتانی سے مستعفی ہونے کا فیصلہ کیا۔جو روٹ کی 5 سالہ کپتانی میں انگلش ٹیم نے 64 ٹیسٹ میچز کھیلے جس میں سے 27 میچز میں انگلش ٹیم کو کامیابی ملی جبکہ 26 میں اسے شکست کا سامنا کرنا پڑا۔31 سالہ جو روٹ نے بحیثیت انگلش کپتان مجموعی طور پر 5 ہزار 295 رنز سکور کیے جس میں ان کی 14 سنچریاں شامل ہیں۔جو روٹ کا استعفے کے اعلان کے بعد کہنا تھا کہ انگلش ٹیسٹ ٹیم کی کپتانی اعزاز تھی جبکہ کپتانی چھوڑنے کا مشکل فیصلہ فیملی سے مشورے کے بعد کیا۔خیال رہے کہ انگلش ٹیسٹ ٹیم آخری 17 ٹیسٹ میچز میں سے صرف ایک ہی جیت سکی جبکہ آسٹریلیا کے بعد ویسٹ انڈیز کیخلاف حالیہ سیریز میں بھی انگلینڈ ٹیم کو ناقص کارکردگی کی وجہ سے شکست کا سامنا کرنا پڑا تھا۔