آل پاکستان ہاکی ٹورنامنٹ نیشنل بینک پی آئی اے کی ٹیمیں فائنل میں پہنچ گئیں

لاہور(نمائندہ سپورٹس+سپورٹس رپورٹر) نیشنل بنک اور پاکستان ائرلائنز نے اپنی حریف ٹیموں کو شکست دے کر نیشنل بنک گولڈ کپ کے فائنل کے لئے کوالیفائی کرلیا۔ فائنل میچ آج شام چاربجے کھیلا جائے گا۔ نیشنل بنک گولڈکپ کے ساتویں روز کھیلے گئے میچوں میں ریلویز نے ہائرایجوکیشن کمشن کو 5-1 سے شکست دی ۔ نیشنل بنک نے واپڈا کو 3-1 سے زیر کیا جبکہ پی آئی اے نے پاک آرمی کو سخت مقابلے کے بعد 3-2سے قابوکیا۔ جمعہ کے روز نیشنل ہاکی سٹیڈیم لاہور میں جاری ٹورنامنٹ میں گذشتہ روز پہلا میچ ریلوے اور ایچ ای سی ٹیموں کے درمیان کھیلا گیا جس میں ریلوے نے ایچ ای سی کو پانچ ایک سے مات دی۔ فاتح ٹیم کی جانب سے عدیل لطیف نے دو، علیم، رضوان اور شہریار نے ایک ایک گول کیا۔ ایچ ای سی کا واحد گول کامران مقصود نے کیا۔ دوسرا میچ نیشنل بنک اور واپڈا کی ٹیموں کے درمیان کھیلا گیا۔ دونوں ٹیموں کے درمیان دلچسپ مقابلہ ہوا جس میں نیشنل بنک نے تین ایک سے کامیابی اپنے نام کی۔ نیشنل بنک کی جانب سے عتیق، اختر علی اور ایوب نے گول سکور کئے جبکہ واپڈا کی جانب سے واحد گول محمد عثمان نے کیا۔ تیسرے میچ میں پی آئی اے نے سخت مقابلے کے بعد آرمی کو تین دو سے مات دی۔ ابوبکر نے دو اور عمران خان نے ایک گول کیا۔ آرمی کی جانب سے شاہد علی خان اور مزمل حق نے گول کئے۔