چینی پیپلز آرمڈ پولیس کے کمانڈر کی ڈی جی رینجرز سندھ میجر جنرل محمد سعید سے ملاقات، کراچی آپریشن میں کردار کو سراہا

کراچی (صباح نیوز)چین کی پیپلز آرمڈ پولیس کے کمانڈر جنرل وانگ ننگ نے ڈی جی رینجرز سندھ میجر جنرل محمد سعید سے ملاقات کی اور کراچی آپریشن میں ان کے کردار کو سراہا۔ پاک فوج کے شعبہ تعلقات عامہ آئی ایس پی آر اعلامیہ کے مطابق جنرل وانگ ننگ نے میجر جنرل محمد سعید سے ملاقات میں انسداد دہشت گردی، شہروں میں دہشت گردی اور پولیسنگ پر گفتگوکی گئی۔ اس موقع پر ڈی جی رینجرز نے مہمانوں کو کراچی آپریشن پر بریفنگ دی جبکہ جنرل وانگ نے امن کے لئے قانون نافذ کرنے والے اداروں کی کاوشوں کو سراہا۔ جنرل وانگ کا کہنا تھا کہ کراچی آپریشن دیگر ممالک کیلئے کامیاب ماڈل ہے تاہم بعد میں انہوں نے مزار قائد پر حاضری بھی دی۔