اسلام آباد( اسپورٹس رپورٹر ) راجر فیڈرر، نوویک جوکووچ، روبرٹو باٹسٹا ایگٹ ، پبلو کارینو بسٹا اور ڈینل مدودوف سنسناٹی ماسٹرز ٹینس ٹورنامنٹ مینز سنگلز پری کوارٹر فائنل میں پہنچ گئے۔بدھ کو امریکہ میں جاری ایونٹ میں کھیلے گئے مینز سنگلز دوسرے رائونڈ میچز میں شہرہ ا?فاق سوئس سٹار اور ریکارڈ 20 مرتبہ کے گرینڈ سلیم چیمپئن فیڈرر نے عمدہ کارکردگی کا مظاہرہ کرتے ہوئے ارجنٹائنی کھلاڑی جان اگناسیو لونڈیرو کو 6-3 اور 6-4 سے ہرا کر پری کوارٹر فائنل تک رسائی حاصل کر لی۔سربین سٹار اور عالمی نمبر ایک جوکووچ نے امریکن حریف ثام قیوری کو 7-5 اور 6-1 سے زیر کر کے پری کوارٹر فائنل کیلئے کوالیفائی کیا، اسپینش کھلاڑی باٹسٹا ایگٹ نے ہورکاز کو شکست دے کر ایونٹ سے باہر کر دیا، اسپین کے کارینو بسٹا بھی دوسری رکاوٹ عبور کرنے میں کامیاب رہے، انہوں نے جان اسنر کو شکست فاش سے دوچار کیا، روسی کھلاڑی ڈینل مدودوف نے برطانیہ کے کائل ایڈمونڈ کو ہرا کر پری کوارٹر فائنل میں جگہ بنا لی۔