مستونگ: مسلح افراد کی گھر میں گھس کر فائرنگ سے میاں بیوی قتل

مستونگ (این این آئی)ضلع مستونگ میں نامعلوم مسلح افراد نے فائرنگ کرکے خاتون سمیت 2 افراد کو قتل کر دیا۔لیویز حکام کے مطابق فائرنگ کا واقعہ نواحی علاقے کنڈاوہ میں پیش آیا، جہاں نامعلوم افراد نے ایک گھر میں گھس کر فائرنگ کردی اور موقع سے فرار ہوگئے۔فائرنگ کے نتیجے میں گھر میں موجود خاتون سمیت 2 افراد جاں بحق ہوگئے، واقعہ کے بعد لاشیں ہسپتال منتقل کردی گئیں جہاں ان کی شناخت عنایت اور نسرین کے نام سے ہوئی ہے جو میاں بیوی بتائے جاتے تھے اور کھیتوں میں مزدوری کرتے تھے۔ذرائع کے مطابق فائرنگ کی وجہ ابھی تک معلوم نہیں ہوسکی ہے ، لیویز فورس کی جانب سے واقعہ کی مزید تحقیقات شروع کر دی گئی ۔