اسلام آباد (این این آئی)سابق وزیراعظم نواز شریف نے توشہ خانہ ریفرنس میں اپنے وارنٹ گرفتاری اور اشتہاری قرار دینے کی کارروائی کو چیلنج کر دیا۔مسلم لیگ ن کے قائد نے بیرسٹر جہانگیر جدون کے ذریعے اسلام آباد ہائی کورٹ سے رجوع کیا۔نواز شریف کی جانب سے دائر درخواست میں کہا گیا کہ توشہ خانہ ریفرنس میں احتساب عدالت کی کارروائی اور اشتہار جاری کرنیکا حکم نامہ کالعدم قرار دیا جائے۔درخواست میں مؤقف اپنایا گیا کہ نیب اپوزیشن کو ٹارگٹ کر کے آواز دبانا چاہتا ہے، نواز شریف مفرور نہیں بلکہ ضمانت پر بیرون ملک ہیں۔نواز شریف نے کہاکہ بیرون ملک علاج جاری ہے، نمائندے کے ذریعے ٹرائل کا سامنا کرنے کی اجازت دی جائے۔سابق وزیراعظم نے درخواست میں کہا کہ یورپی یونین اور ہیومن رائٹس واچ نے بھی نیب کی کارروائیوں پر تحفظات کا اظہار کیا ہے۔خیال رہے کہ توشہ خانہ ریفرنس میں احتساب عدالت نے 11 جون کو نواز شریف کے ناقابل ضمانت وارنٹ گرفتاری جاری کیے تھے۔7 جولائی کو نواز شریف کی احتساب عدالت میں طلبی کے لیے کارروائی کا آغاز ہوا اور پھر 13 جولائی کو جاتی امرا میں نواز شریف کی رہائشگاہ کے باہر طلبی کا نوٹس چسپاں کیا گیا۔