لاہور(سپورٹس رپورٹر)پاکستان کرکٹ بورڈ نے جنوبی افریقہ کی خواتین کرکٹ ٹیم کے خلاف ہونے والی ہوم سیریز کیلئے امپائرز اور میچ ریفریز پر مشتمل میچ آفیشلز پینل کا اعلان کردیا ہے،چھ محدود اوورز کے میچوں کی یہ سیریز یکم سے 14 ستمبر تک کراچی میں کھیلی جائیگی۔محمد جاوید ملک اور علی نقوی سیریز میں میچ ریفریز ہونگے یہ دونوں اس وقت آئی سی سی کے انٹرنیشنل پینل آف میچ آفیشلز کے علاوہ پی سی بی کے ایلیٹ پینل آف میچ ریفریز کا حصہ ہیں۔ عافیہ امین اور سلیمہ امتیاز کو پہلی بار کسی دو طرفہ انٹرنیشنل سیریز میں ریزرو امپائرز کے طور پر شامل کیا گیا ہے۔یہ دونوں پاکستان کرکٹ بورڈ کے ویمنز پینل آف امپائرز میں شامل ہیں۔جنوبی افریقہ کی خواتین ٹیم کیخلاف تین ٹی ٹونٹی میچز یکم سے 4 ستمبر کراچی میں کھیلے جائیں گے جس کے بعد 8 سے 14 ستمبر تک تین ون ڈے میچ ہونگے جو آئی سی سی ویمنز چیمپئن شپ کا حصہ ہونگے۔تیسرا ٹی ٹونٹی میچ جو اس سے قبل پانچ ستمبر کو ہونا تھا اب چار ستمبر کو کھیلا جائیگا۔فیصل آفریدی،راشد ریاض اور طارق رشید سیریز میں امپائرنگ کریں گے۔ٹی ٹونٹی میچز شام ساڑھے سات بجے شروع ہونگے جبکہ ون ڈے میچز سہ پہر ساڑھے تین بجے شروع ہونگے۔