ارشد ندیم کا دورہ کراچی، گورنر سندھ سے ملاقات، مزار قائد پر حاضری

کراچی (این این آئی) ارشد ندیم نے کراچی میں گورنر سندھ کے ہمراہ نیوز کانفرنس کرتے ہوئے 100 طلبہ وطالبات کے لیے لیپ ٹاپ کے تحائف دینے کا اعلان کیا اور کہا کہ مستقبل میں وہ کراچی میں اکیڈمی بنانے کا منصوبہ رکھتے ہیں جس پر وقت آنے پر کام کریں گے۔ ارشد ندیم نے کہا کہ وہ 2028  اور 2032  کے اولمپکس میں بھی پاکستان کی نمائندگی کرنا اور گولڈ میڈل جیتنے کے خواہشمند ہیں۔ ایڈیشنل آئی جی پولیس، وزیراعلی سندھ، میئر کراچی سمیت کراچی کے عوام کا شکر گزار ہوں جنہوں نے اتنی عزت دی اور حوصلہ افزائی کی۔ ارشد ندیم نے کہا کہ وزیراعلی پنجاب مریم نواز نے بھی میرے گائوں آکر مجھے عزت بخشی، اسی طرح کراچی اور سندھ کے عوام نے بھی بڑا پیار دیا۔ اس موقع پر گورنر سندھ کامران ٹیسوری نے کہا کہ قومی ہیرو کی ایک جھلک دیکھنے لوگ گورنر ہائوس میں جمع ہوئے، پیار محبت عزت سے نوازا، 5 کروڑ سندھ حکومت بھی دے رہی ہے جبکہ گورنر ہائوس سے 10 کروڑ تک رقم جمع ہوئی۔ دریں اثنا ارشد ندیم گورنر سندھ کے ہمراہ مزار قائد پر بھی گئے جہاں انہوں نے بابائے قوم کے لئے دعا کی۔