ہاکی ورلڈ کپ کا فاتح ہالینڈ یا بیلجیئم،فیصلہ آج بھوبنیشور میں ہو گا

بھوبنیشور (اے پی پی) ہالینڈ نے دفاعی و عالمی چیمپئن آسٹریلیا کو شکست دے کر ایف آئی ایچ ورلڈ کپ ہاکی ٹورنامنٹ فائنل میں جگہ بنا لی، بیلجیئم نے انگلینڈ کو ہرا کر پہلی مرتبہ فائنل کیلئے کوالیفائی کیا، ہالینڈ اور بیلجیئم کی ٹیمیں فیصلہ کن معرکے میں (آج) اتوار کو آمنے سامنے ہوں گی، تیسری پوزیشن کے میچ میں آسٹریلیا کا مقابلہ انگلینڈ سے ہو گا۔ پہلے سیمی فائنل میں بیلجیئم نے انتہائی شاندار کھیل کا مظاہرہ کرتے ہوئے حریف انگلینڈ کو یکطرفہ مقابلے کے بعد 6-0 گولز سے ہرا کر فائنل میں پہنچنے کا اعزاز حاصل کیا، دوسرے سیمی فائنل میں ہالینڈ نے دفاعی چیمپئن آسٹریلیا کو سنسنی خیز مقابلے کے بعد پنالٹی اسٹروکس پر 4-3 گولز سے شکست دے کر فائنل تک رسائی حاصل کی، ، مقررہ وقت تک دونوں ٹیموں کے درمیان مقابلہ 2-2 گولز سے برابری پر ختم ہوا تاہم پنالٹی اسٹروکس پر ہالینڈ نے آسٹریلیا کو 3 کے مقابلے میں 4 گولز سے شکست دے کر فائنل کیلئے کوالیفائی کیا۔