عابد علی،بابر اعظم کی سنچریاں، پنڈی ٹیسٹ ڈرا

لاہور(سپورٹس رپورٹر)پاکستان اور سری لنکا کے درمیان راولپنڈی میں پہلے ٹیسٹ میچ میں عابد علی اور بابر اعظم نے سنچریاں سکور کر کے ملک میں ٹیسٹ کرکٹ کی واپسی کو یادگار بنا دیا لیکن بارش کے سبب میچ ڈرا ہو گیا۔ میچ کے پانچویں روز سری لنکا نے 6 وکٹوں کے نقصان پر 308 رنز بنانے کے بعد اننگز ڈکلیئر کردی۔ سری لنکا کے دھننجیا ڈی سلوا اور دلرووان پریرا نے اپنی نامکمل اننگز کا آغاز 282 رنز سے کیا اور سکور میں مزید 26 رنز کے اضافے کے بعد سری لنکن کپتان نے اننگز ڈکلیئر کردی۔سری لنکا کے دھننجیا ڈی سلوا 102 اور دلرووان پریرا 16 رنز بناکر ناٹ آؤٹ رہے۔ کپتان دیموتھ کرونارتنے نے 59 اور اوشادا فرنینڈو نے 40 رنز بنائے۔ شاہین شاہ آفریدی اور نسیم شاہ نے دو دو جبکہ عثمان شنواری اور محمد عباس نے ایک ایک وکٹ حاصل کی۔پاکستان نے اپنی پہلی اننگز شروع کی تو شان مسعود بغیر کوئی رن بنائے پویلین لوٹ گئے۔3رنز پر پہلی وکٹ گرنے کے بعد عابد علی کا ساتھ دینے کپتان اظہر علی آئے اور دونوں کھلاڑیوں نے ذمے دارانہ کھیل پیش کرتے ہوئے 87رنز کی شراکت قائم کی۔ اظہرعلی 36رنز بنانے کے بعد پویلین لوٹ گئے۔عابد علی نے دوسرے اینڈ سے عمدہ بیٹنگ جاری رکھی اور ڈیبیو پر نصف سنچری مکمل کرنے کیساتھ ساتھ بابر اعظم کے ہمراہ بہترین بیٹنگ کا مظاہرہ کرتے ہوئے ڈرا کی جانب گامزن میچ میں اچھی بیٹنگ پریکٹس کی۔پہلا ٹیسٹ میچ کھیلنے والے عابدعلی نے بھرپور اعتماد کا ثبوت دیتے ہوئے ون ڈے پر ڈیبیو کے بعد اب پہلی ٹیسٹ اننگز میں بھی سنچری جڑ کر نئی تاریخ رقم کردی۔عابد علی کے بعد بابر اعظم نے بھی سنچری سکور کی اور اگلے ٹیسٹ میچ سے قبل بھرپور میچ پریکٹس کی۔بابر اعظم کی سنچری کی تکمیل کے بعد ساتھ ہی امپائرز نے دونوں کپتانوں کی باہمی رضامندی سے میچ کو ختم کرنے کا فیصلہ کر لیا اور پہلا ٹیسٹ میچ ڈرا پر ختم ہوا۔جب میچ ختم ہوا تو پاکستان نے دو وکٹوں کے نقصان پر 252رنز بنائے تھے اور اسے سری لنکا کی پہلی اننگز کا سکور برابر کرنے کیلئے مزید 56رنز درکار تھے۔ عابد نے 201 گیندوں پر 11 چوکوں کی مدد سے 109رنز جبکہ بابر اعظم نے بھی 102رنز کی اننگز کھیلی۔ڈیبیو پر سنچری بنانے والے بلے باز کو میچ کا بہترین کھلاڑی قرار دیا گیا۔ میچ کے تین دن مسلسل بارش کے سبب کھیل تقریباً نہ ہو سکا اور دونوں ٹیمیں میچ میں اپنی ایک بھی اننگز مکمل نہ کر سکیں۔میچ کے پہلے دن بارش اور خراب روشنی کے سبب صرف 68.1اوورز ‘ اگلے دن صرف 18اوورز ہی شائقین کو کرکٹ دیکھنے کا موقع ملا۔میچ کے تیسرے دن بھی چند اوورز ہی بارش نے کھیل کی اجازت دی جبکہ چوتھے دن تو سرے سے ایک بھی گیند نہ پھینکی جا سکی۔میچ کے لیے دونوں ٹیمیں ان کھلاڑیوں پر مشتمل تھیں۔پاکستانی ٹیم: میں کپتان اظہر علی ‘حارث سہیل، عابدعلی، شان مسعود، بابراعظم، اسد شفیق، محمدرضوان، محمدعباس، شاہین شاہ آفریدی، نسیم شاہ اور عثمان شنواری شامل ہیں۔سری لنکن ٹیم: نروشن ڈک ویلا، دھننجیا ڈی سلوا، دلروان پریرا، وشوا فرنینڈو، کاسون راجیتھا، لہرو کمارا، دیموتھ کرونارتنے، اوشادافرنینڈو، کوشال مینڈس، اینجلو میتھیوز اور دنیش چندیمل سری لنکن ٹیم میں شامل ہیں۔