ملک بھر میں حضرت علیؓ کی ولادت باسعادت پر جشن و میلاد کی تقریبات 

لاہور (خصوصی نامہ نگار) ملک بھر میں مولود کعبہ شیر خدا امیر المومنین حضرت علیؓ ابن ابی طالب کی ولادت باسعادت کے موقع پر جشن و میلاد کی تقریبات کا انعقاد کیا گیا۔ ترجمان متروکہ وقف املاک بورڈ عامر حسین ہاشمی کے زیراہتمام کیک کاٹنے کی تقریب میں ایڈیشنل سیکرٹری رانا شاہد‘ سید فراز عباس‘ عدیل احمد‘ علی اصغر‘ ذیشان گورسی‘ مبشر حسین‘ امجد الطاف‘ عمران نذیر‘ رضوان علی‘ محمد ارشد و دیگر نے شرکت کی ۔ ملکی ترقی و خوشحالی کی دعائیں مانگی گئیں۔ عامر ہاشمی نے کہا کہ حضرت علیؓ کی شان لفظوں میں بیان نہیں ہو سکتی۔ حضور نبی کریمؐ نے خود آپ ؓکی فضیلت کو لوگوں میں عام کیا۔ کھاڑک میں نوید علی کی رہائشگاہ پر محفل میلاد سے آغا علی حسنین مہدوی نے خطاب کرتے ہوئے فضائل علیؓ بیان کئے۔ محلہ ککے زہیاں شاہدرہ میں علی اصغر کربلائی کے زیراہتمام تقریب منعقد ہوئی اور کیک کاٹنے کے بعد نیاز امام تقسیم کی گئی۔ انجمن ابوذر غفاری کے زیراہتمام سبزہ زار میں جشن کی محفل میں پروفیسر ڈاکٹر بہادر علی زیدی‘ مولانا فیضان حیدر زیدی اور خدیش رضا نے اپنے نذرانہ عقیدت پیش کرتے ہوئے محمد و آل محمد اور مولا علیؓ کی شان بیان کی۔