آسکرز میں ایک نئے ایوارڈ کا اضافہ کردیا گیا

 دنیا کے سب سے بڑے شوبز ایوارڈ اکیڈمی ایوارڈز المعروف آسکر ایوارڈز میں ایک نئے ایوارڈ کا اضافہ کردیا گیا ہے۔ غیر ملکی میڈیا کی رپورٹ کے مطابق اس نئے ایوارڈ کا نام فین فیوریٹ ایوارڈ ہے جو 94ویں اکیڈمی ایوارڈز میں مداحوں کی بہترین فلم کو دیا جائے گا۔ خیال رہے کہ 94ویں اکیڈمی ایوارڈز 27 مارچ کو ٹیلی کاسٹ کیے جائیں گے۔ نئے ایوارڈ سے متعلق آرگنائزرز کا کہنا ہے کہ اس فین فیوریٹ ایوارڈ کے امیدواروں کے لیے اسٹارز کے مداح انہیں ٹوئٹر پر ووٹنگ کے ذریعے منتخب کرواسکتے ہیں۔ خیال رہے کہ یہ اس ایوارڈ کا اعلان ایسے وقت میں کیا گیا ہے جب اسپائیڈر مین: نو وے ہوم اور نو ٹائم ٹو ڈائی جیسی فلمیں بڑی کیٹیگریز میں نامزدگیاں حاصل کرنے میں ناکام رہی ہیں۔ بتایا جارہا ہے کہ ٹوئٹر پر صارفین ہیش ٹیگ #OscarsFanFavorite استعمال کرتے ہوئے یا پھر ویب سائٹ پر جاکر فین فیوریٹ کی کیٹیگری میں ووٹ کرسکتے ہیں۔