پاکستان سپر لیگ ، افتتاحی تقریب کل، لیزر شو اور آتش بازی کا مظاہرہ ہوگا

لاہور(سپورٹس رپورٹر+نامہ نگار)پاکستان سپر لیگ افتتاحی تقریب میں کل گلوکار علی ظفر، آئمہ بیگ سمیت نوری اور عارف لوہار فن کا جلوہ بکھریں گے۔لیزر شو اور آتش بازی کا بھی مظاہرہ کیا جائیگا، تقریب کا آغاز ساڑھے 6 بجے ہوگا جبکہ سٹیڈیم کے گیٹ شائقین  کیلئے ساڑھے3 بجے کھلیں گے۔ نویں ایڈیشن کا پہلا میچ میزبان لاہور قلندرز اور اسلام آباد یونائیٹڈ کے درمیان کھیلا جائیگا۔ آئی جی پنجاب ڈاکٹر عثمان انور اور ڈی آئی جی آپریشنز علی ناصر رضوی نے کہا کہ پنجاب میں میچز کے دوران20 ہزار سے زائد اہلکار ڈیوٹی دینگے۔ پاک فوج کی 3 کمپنیاں بھی  سکیورٹی پر مامور ہونگی۔  شریک ٹیموں کو سٹیٹ گیسٹ کا درجہ دیا جائیگا، ٹیموں کی نقل و حرکت اور میچز کے دوران جیمرز کی تنصیب بھی کی جائیگی۔ روٹس کی فضائی نگرانی ہیلی کاپٹرز کے ذریعے کی جائیگی۔ سیف سٹیز کے کیمروں سے ایونٹ کی 24 گھنٹے مانیٹرنگ ہوگی۔  ٹیموں کے روٹس اور سٹیڈیم میں اضافی کیمرے نصب ہونگے۔