کراچی(این این آئی)پاکستان تحریک انصاف کے سندھ اسمبلی میں پارلیمانی لیڈر خرم شیر زمان نے اتوارکو کراچی میں ہونے والے بلدیاتی انتخابات میں ضلع جنوبی کی یوسی 12 کے وارڈ 2 میں ووٹ کاسٹ کیا۔اس موقع پر میڈیا سے بات چیت کرتے ہوئے خرم شیر زمان نے کہاکہ کراچی والوں نے فیصلہ کرنا ہے کہ ان کا 4 سال کا مستقبل کیا ہو گا، ایک پارٹی کے میئر نے رو رو کر 4 سال گزارے، آج وہ پارٹی الیکشن سے بھاگ گئی۔انہوں نے کہاکہ مجبور قومی موومنٹ نے بائیکاٹ کر کے اچھا فیصلہ کیا،حافظ نعیم الرحمن آپ خواب دیکھنا چھوڑ دیں، پی ٹی آئی کے ووٹرز پی ٹی آئی کو ہی ووٹ دیں گے۔انہوں نے کہا کہ پی پی نے کراچی والوں کا وہ حال کیا ہے کہ قبرستانوں میں جگہ نہیں ہے، ان کو باقی جگہوں سے بھگایا ہے، یہاں سے بھی بھگائیں گے۔انہوں نے بتایاکہ آج میری بیٹی نے پہلا ووٹ کاسٹ کیا ہے۔