راولپنڈی (سٹاف رپورٹر)پنجاب آرٹس کونسل میں ٹیلنٹ کو پروان چڑھانے کے لیے ورائٹی میوزیکل شو کا اہتمام کیا گیا۔جس میں صوبہ بھرسے گلوکاروں کو مدعو کیا گیا تھا۔ورائٹی میوزیکل شو کے مہمان خصوصی ڈائریکٹر آرٹس کونسل وقار احمد تھے۔ڈائریکٹر آرٹس کونسل وقاراحمد کا کہنا تھا کہ ہماری ثقافت ہماری پہچان ہے جن قوموں کی کوئی پہچان نہیں ہوتی تاریخ انہیں فراموش کر دیتی ہے ہم لوگ خوش قسمت ہیں کہ ہماری ثقافت اپنی مثال آپ ہے جسے دنیا بھر میں پسند کیا جاتا ہے۔پنجاب کے لوک گیت پورے ملک کی ثقافت میں اپنی منفرد پیچان رکھتے ہیں جس میں پنجاب کے لوگوں کی روایات، سادگی اور پرخلوص محبت کے جذبے پوشیدہ ہیں۔ انہوں نے کہا کہ پنجاب کے فنکاروں نے اپنے لوک گیتوں، انکی دھنوں اور مفرد لب و لہجے کو بھر پور انداز میں محفوظ رکھا ہے اور آج کی نوجوان نسل کو بھی اس مستفید کر رہے ہیں۔اسسٹنٹ ڈائریکٹر محمد سلیمان نے کہا کہ فنکا ر دنیا بھر میں امن کے پیام بھر سمجھے جاتے ہیں۔ڈپریشن کے ماحول میں میوزیکل نائٹس کا ا نعقاد خوش آئند ہے۔پاکستان فنکاروں میں ٹیلنٹ کی کوئی کمی نہیں۔کلاسیکل موسیقی میں پاکستانی گلوکاروں نے دنیا بھر میں پاکستان کا نام روشن کیا ہے۔ورائٹی میوزیکل پروگرام میں طاہر نئیر،گلاب،عاصمہ لتا،ثقلین موسی خیلوی،امیرہ میر،شرافت بلوچ،ساغر خان،جہانگیر خان نے اپنی آواز کا جادو جگا کر حاضرین محفل سے خوب داد سمیٹی۔ون مین کامیڈی شو میں حمید بابر، شاہد بھولا اور سعید انور نے بھی حاضرین محفل کو خوب محظوظ کیا۔ورائٹی میوزیکل نائٹ میں جڑوں شہروں سے لوگوں کی ایک بڑی تعداد شریک ہوئی۔