لاہور؍ فیروز والہ (نامہ نگاران) شہر کے مختلف علاقوں میں ڈاکوؤں اور چوروں نے چوری و ڈکیتی کی وارداتوں میں متعدد شہریوں سے لاکھوں روپے مالیت کی نقدی، طلائی زیورات، موبائل فون، موٹر سائیکلیں، گاڑیاں اور دیگر سامان لوٹ لیا ہے۔ تفصیلات کے مطابق ڈاکوؤں نے نواب ٹاؤن کے علاقے میں عظیم کے گھر میں گھس کر اہلخانہ کو گن پوائنٹ پر یرغمال بنا کر 5 لاکھ روپے مالیت کی نقدی، طلائی زیورات، موبائل فون اور دیگر سامان، گجرپورہ کے علاقے میں حسنین اور اس کی فیملی سے اسلحہ کے زور پر 3لاکھ 75 ہزار روپے مالیت کی نقدی، زیورات اور موبائل فون، ہنجروال کے علاقے میں اسد سے اسلحہ کے زور پر 65 ہزار روپے اور موبائل فون، اقبال ٹاؤن کے علاقے میں تیمور سے80 ہزار روپے اور موبائل فون، چوہنگ کے علاقے میں ساجد سے 70 ہزار روپے اور موبائل فون، شاہدرہ ٹاؤن کے علاقے میں عابد سے60 ہزار اور موبائل فون، نواں کوٹ کے علاقے میں نسیم سے 42 ہزار روپے اور موبائل فون، سول لائن کے علاقے میں ارسلان سے 27 ہزار روپے اور موبائل فون لوٹ لیا اور فرار ہوگئے ہیں۔ چوروں نے سندرکے علاقے میں سفیان کے گھر کے تالے توڑ کر ساڑھے 4 لاکھ روپے مالیت کی نقدی اور دیگر گھریلو سامان چوری کرلیا ہے۔ چوروں نے جوہر ٹاؤن، ڈیفنس بی اور سبزہ زار کے علاقوں میں سے3 گاڑیاں، مزنگ سے رکشہ جبکہ راوی روڈ، مسلم ٹاؤن، گڑھی شاہو، ریس کورس، پرانی انارکلی، کاہنہ، مانگا منڈی اور فیکٹری ایریا کے علاقوں سے 8موٹر سائیکلیں چوری کرلی ہیں۔ لاہور روڈ کی آبادی جمال ٹاؤن میں ڈاکوؤں نے علی احمد کے گھر داخل ہو کر اہل خانہ کو کمرے میں بند کر کے تشدد کا نشانہ بنا کر  تقریبا 45 لاکھ روپے مالیت کے زیورات اور نقدی لوٹ کر لے گئے، تھانہ فیکٹری ایریا کے علاقہ کوٹ پنڈی داس میں  ڈاکوؤں نے سلامت سے 50ہزار روپے نقدی موبائل  چھین کر فرار،  ڈاکوؤں نے موبائل شاپ کے ملازم ریحان حیدر کو روک کر لوٹ لیا۔ ڈاکو ساڑھے 16 لاکھ کی رقم  چھین کر لے گئے۔ بتایا جاتا ہے کہ ریحان  بنک میں  رقم جمع کروانے جارہا تھا کہ راستے میں ڈاکوئوں نے اسے روک کر لوٹ لیا  اور ہاؤسنگ  کالونی  میں ڈاکوئوں نے دکان میں داخل ہو کر اس کے مالک کو  لوٹ لیا۔ مزاحمت پر ڈاکو نے گولی مار کر دکاندار کو زخمی کر دیا، ڈاکو فرار ہو گئے۔  منڈیالی کے قریب ڈاکو نے موٹر سائیکل سوار کو روک کر لوٹ لیا۔  مزاحمت پر اسے تشدد کا نشانہ بنایا۔ نقدی، موبائل اور موٹر سائیکل  لے گئے۔ لاہور روڈ پر خانپور نہر کے قریب ڈاکووں نے دو سگے بھائیوں کو روک کر لوٹ لیا۔ ان سے ڈیڑھ لاکھ روپے رقم اور دو موبائل چھین کر لے گئے۔ مبشر نے اس واقعہ کی اطلاع پولیس کو  دے دی۔