شنگھائی میں پاک چین مشترکہ بحری مشقیں باہمی تعاون مضبوط ہوگا: ترجمان بحریہ 

کراچی (نوائے وقت رپورٹ)  پاکستان اور چینی بحریہ کے مابین دو طرفہ بحری مشق سی گارڈینز 2022 چین کے شہر شنگھائی میں  ہوئی۔ ترجمان پاک بحریہ کے مطابق پاکستان اور چین کے مابین بحری مشقیں سی گارڈینز دوطرفہ مضبوط عسکری تعلقات کا مظہر ہیں جو خطے میں محفوظ اور پائیدار بحری ماحول کو فروغ دیتا ہے۔انہوں نے بتایا کہ مشق سے دونوں بحری افواج کی پیشہ وارانہ مہارتوں اور باہمی تعاون کو مزید فروغ ملے گا۔ پاک بحریہ کی طرف سے دوطرفہ اور کثیرالقومی مشقوں کا باقاعدہ انعقاد سمندر میں امن و امان برقرار رکھنے اور تمام دوست بحری افواج کے ساتھ قریبی تعلقات کے عزم کا مظہر ہے۔ ترجمان پاک بحریہ کے مطابق چین کے ساتھ مشترکہ بحری مشق سے دونوں ممالک بالخصوص بحری افواج کے مابین دو طرفہ تعلقات اور تعاون کو مزید فروغ ملے گا۔