مائیکرو سافٹ کی ونڈوز 12  آپریٹنگ سسٹم 2024 میں  متعارف کرانے کی تیاری شروع 

واشنگٹن (کامرس ڈیسک) مائیکرو سافٹ کا نیا ونڈوز 11 آپریٹنگ سسٹم ابھی تمام صارفین کو دستیاب نہیں مگر کمپنی نے اس کے نئے ورژن ونڈوز12کو متعارف کرانے کی تیاری شروع کردی ہے۔ونڈوز سینٹرل کی ایک رپورٹ کے مطابق مائیکرو سافٹ کی جانب سے ونڈوز 12 کو 2024 میں متعارف کرایا جاسکتا ہے۔رپورٹ میں بتایا گیا کہ مائیکرو سافٹ کی جانب سے ونڈوز کے نئے آپریٹنگ سسٹم کو ہر 3 سال بعد متعارف کرانے کا سلسلہ شروع کیا جا رہا ہے۔یہ مائیکرو سافٹ کی جانب سے ونڈوز کی تیاری کے حوالے سے بڑی تبدیلی ہے۔مائیکرو سافٹ نے 2015 میں ونڈوز 10 آپریٹنگ سسٹم کو متعارف کرایا تھا تو اس سے قبل ہر 3 سال میں ایک بار نئے آپریٹنگ سسٹم کو پیش کیا جاتا تھا۔ونڈوز 10 کو ہر سال 2 بار بڑے فیچرز سے اپ ڈیٹ کیا جاتا تھا اور اس وقت کمپنی کے عہدیداران کا کہنا تھا کہ ونڈوز 10 کے بعد کوئی نیا آپریٹنگ سسٹم متعارف نہیں کرایا جائے گامگر 2021 میں مائیکرو سافٹ نے ونڈوز 11 کو متعارف کرایا اور ونڈوز 12 کی تیاری بھی شروع کردی ہے۔مائیکرو سافٹ نے اس حوالے سے کوئی باضابطہ اعلان نہیں کیا اور فی الحال ونڈوز 11 کو ہر صارف تک پہنچانے کیلئے کام کیا جارہا ہے۔