لسبیلہ‘ کوہستان‘ چترال میں ٹریفک حادثات‘ 8 افراد جاں بحق‘ 25 زخمی

لسبیلہ‘ کوہستان‘ چترال (آئی این پی+ نوائے وقت رپورٹ) مختلف ٹریفک حادثات میں 8 افراد جاں بحق‘ 25 زخمی‘ بلوچستان کے دارالحکومت کوئٹہ سے کراچی جانے والی مسافر بس حادثے کا شکار ہوگئی۔ ریسکیو حکام کے مطابق حادثہ لسبیلہ کے قریب کھکر گولائی کے مقام پر پیش آیا، جس کے نتیجے میں 3 مسافر جاں بحق جبکہ20  سے زائد زخمی ہو گئے۔ حکام کا کہنا ہے کہ حادثہ تیز رفتاری کے باعث پیش آیا۔ وفاقی دارالحکومت اسلام آباد سے سکردو جانے والی کار حادثے کا شکار ہو گئی جس کے نتیجے میں کار میں سوار 5 افراد میں سے2 جاں بحق‘ لوئر کوہستان پولیس کے مطابق افسوس ناک حادثہ حدود تھانہ دوبیر جیجال بمقام (شیطان پڑی) موقع پر پیش آیا، ریسکیو اور مقامی لوگوں کی مدد سے نعشوں اور زخمیوں کو الشفا ہسپتال دوبیر منتقل کیا گیا۔ چترال پولیس کے مطابق دوما کومی کے مقام پر جیپ کھائی میں جا گری‘ حادثے میں تین افراد جاں بحق اور دو زخمی ہو گئے۔ زخمیوں کو طبی امداد کیلئے ہسپتال منتقل کر دیا گیا ہے۔