’’کمال ہے‘ یمال ہے‘‘ فیفا کی  سپین کے یمال کی اردو میں تعریف

برلن (نیٹ نیوز) یوروکپ میں شاندار کارکردگی کا مظاہرہ کرنے پر فیفا نے منفرد انداز میں ہسپانوی فٹبالر لامین یمال کی تعریف کر دی۔ ٹورنامنٹ میں سپین کے فٹبالر لامین یمال نے دنیا کے سامنے خود کو منوایا اور انہیں یوروکپ 2024ء کا ’ینگ پلیئر آف دی ٹورنامنٹ‘ کا ایوارڈ دیا گیا۔ لامین یمال نے یوروکپ کے فائنل سے ایک روز قبل ہی اپنی 17ویں سالگرہ منائی تھی اور وہ کوئی بھی یوروکپ فائنل کھیلنے والے کم عمر ترین کھلاڑی ہیں۔ یوروکپ کے دوران لامین یمال کی شاندار کارکردگی پر فیفا نے اردو میں ان کی تعریف کی، فیفا کے آفیشل فیس بک پیج پر لامین یمال کی تصویر پوسٹ کی گئی جس کے ساتھ رومن حروف تہجی میں 'Kamaal Hai, Yamal Hai' (کمال ہے، یمال ہے) لکھا۔