دوسرے ہاف میں برازیل نے جارحانہ حکمت عملی اپنائی اور پچپن ویں منٹ میں برازیل کے مائیکون ڈگلس نے گیند کو مخالف ٹیم کے جال کی راہ دکھا کر اپنی ٹیم کو برتری دلا دی۔ بہترویں منٹ میں برازیل کے ایلانو نے دوسرا گول کرکے اپنی ٹیم کی پوزیشن کو مستحکم کردیا۔ شمالی کوریا کے جی یون نام نے کھیل کے آخری لمحات میں اپنی ٹیم کی جانب سے واحد گول سکور کیا۔
ٹورنامنٹ کے گروپ جی میں آئیوری کوسٹ اور پرتگال کے درمیان کھیلا گیا میچ بغیر کسی گول کے برابر رہا۔ دونوں ٹیموں نے ایک دوسرے کے گول پر مسلسل حملے کئے تاہم کوئی بھی ٹیم گول کرنے میں ناکام رہی۔
ادھر گروپ ایف میں نیوزی لینڈ اور سلواکیہ کے درمیان کھیلا گیا سنسنی خیز میچ بھی ایک،ایک گول سے برابر رہا۔ پچاس ویں منٹ میں سلواکیہ کے روبرٹ ویٹک نے گیند کو جال کی راہ دکھا دی۔ نیوزی لینڈ کے ونسٹن ریڈ نے انجری ٹائم میں گول کرکے مقابلہ ایک،ایک گول سے برابر کردیا۔