سبی، بم دھماکہ، 4 ایف سی اہلکارشہید،6 زخمی

 کوئٹہ (نوائے وقت رپورٹ) بلوچستان کے علاقے سبی میں بم دھماکے میں 4 ایف سی اہلکار شہید اور 6 شدید زخمی ہو گئے۔ سکیورٹی ذرائع کے مطابق سبی کی تحصیل سانگان میں سکیورٹی فورسز کے قافلے کو دیسی ساختہ بم سے نشانہ بنایا گیا جس کے نتیجے میں 4 ایف سی اہلکار شہید اور 6 شدید زخمی ہو گئے۔ شہید اور زخمی ہونے والے فرنٹیئر کور کے اہلکاروں کو ائیر ایمبولینس کے ذریعے کمبائنڈ ملٹری ہسپتال (سی ایم ایچ) سبی منتقل کر دیا گیا۔ زخمی ہونے والے تمام 6 اہلکاروں کی حالت تشویشناک بتائی جاتی ہے۔ واقعے کی اطلاع ملتے ہی سکیورٹی فورسز نے جائے وقوعہ پر پہنچ کر علاقے کو گھیرے میں لے لیا اور سرچ آپریشن شروع کر دیا ہے۔