پی ٹی آئی کا مراد سعید، ڈاکٹر یاسمین راشد اور اعظم سواتی کو سینیٹ کا ٹکٹ دینے کا فیصلہ

پی ٹی آئی کا مراد سعید، ڈاکٹر یاسمین راشد اور اعظم سواتی کو سینیٹ کا ٹکٹ دینے کا فیصلہ۔ تفصیلات کے مطابق تحریک انصاف کی جانب سے سینیٹ الیکشن کیلئے امیدواروں کی حتمی فہرست جلد جاری کیے جانے کا امکان ہے۔ اے آر وائی نیوز سے گفتگو کرتے ہوئے تحریک انصاف کے سینئر رہنما عاطف خان کی جانب سے بتایا گیا ہے کہ پارٹی نے مراد سعید، ڈاکٹر یاسمین راشد اور اعظم سواتی کو سینیٹ الیکشن کا ٹکٹ جاری کرنے کا فیصلہ کیا ہے۔ دوسری جانب سینیٹ کی 48 نشستوں پر انتخابات کے لئے کاغذات نامزدگی جمع کرانے کا سلسلہ شروع ہوگیا، کاغذات نامزدگی آج اور کل جمع کروائے جا سکیں گے۔ سینیٹ میں پنجاب اور سندھ کی 12، 12، بلوچستان اور کے پی کے کی 11 گیارہ نشستوں پر انتخابات 2 اپریل کو ہوں گے، اسلام آباد سے سینیٹ کی 2 نشستوں پر بھی انتخابات ہوں گ چاروں صوبوں سے سینیٹ کی 7 ،7 جنرل، دو 2 ٹیکنوکریٹ اور 2 خواتین کی 2،2 نشستوں پر الیکشن ہوں گے۔پنجاب اور سندھ سے ایک ایک اقلیتی نشست پر بھی انتخاب ہوگا جبکہ اسلام آباد سے ایک جنرل اور ایک ٹیکنوکریٹ نشست پر انتخاب ہوگا۔ سینیٹ کی 6 نشستوں پر ضمنی انتخابات میں پیپلز پارٹی 4 جبکہ ن لیگ اور جے یو آئی ایک ایک نشست پر کامیاب ہوچکی ہیں۔ یاد رہے کہ گزشتہ روز الیکشن کمیشن نے سینیٹ کی 48 نشستوں پر انتخابات کا شیڈول جاری کیا تھا۔ اعلامیے کے مطابق سینیٹ الیکشن کیلئے کاغذات نامزدگی 15 اور 16 مارچ کو جمع کرائے جاسکتے ہیں، امیدواروں کی فہرست 17 مارچ کو آویزاں کی جائے گی، سینیٹ انتخابات کی سکرونٹی 19 مارچ کو ہوگی۔ انتخابی شیڈول کے مطابق کاغذات نامزدگی پر اعتراضات 21 مارچ تک دائر کئے جا سکیں گے، ٹریبونل 25 مارچ تک تمام اعتراضات نمٹائیں گے، 26 مارچ کو امیدواروں کی عبوری فہرست جاری کی جائے گی، 28 مارچ تک امیدوار کاغذات نامزدگی واپس لے سکتے ہیں