پاکستان کا دورہ ویسٹ انڈیز،شیڈول جاری،ٹی ٹونٹی ورلڈ کپ کی تیاری کرینگے:وسیم خان

لاہور(سپورٹس رپورٹر )پاکستان کرکٹ ٹیم کے دورہ ویسٹ انڈیز کا شیڈول جاری کردیا گیا۔پی سی بی ترجمان کے مطابق پاکستان ٹیم 21 جولائی سے 24 اگست تک ویسٹ انڈیز کا دورہ کریگی، دورے میں 5 ٹی ٹونٹی میچز اور دو ٹیسٹ میچز کھیلے جائیں گے۔ سیریز میں ایک ٹیسٹ کم کر کے دو ٹی ٹونٹی میچز  بڑھا دیے گئے ہیں۔5 ٹی ٹونٹی میچز دو وینیوز بارباڈوس اور گیانا میں کھیلے جا ئیں گے۔ٹی ٹونٹی میچز 27اور 28  بار باڈوس میں ہوں گے۔ 31 جو لائی ، یکم اگست اور تین اگست کو ٹی ٹونٹی میچز گیانا میں کھیلے جائیں گے۔ ٹیسٹ سیریز سے قبل دو  روزہ پریکٹس میچ گیانا میں ہو گا جبکہ جمیکا میں پہلا ٹیسٹ 12 اور دوسرا ٹیسٹ 20 اگست سے شروع  ہو گا۔25اگست کو وطن واپسی ہوگی۔پاکستان کرکٹ بورڈ کے چیف ایگزیکٹو وسیم خان نے کہاہے کہ قومی ٹیم کا دورہ ویسٹ انڈیزہمیشہ قابل قدر اور بہت اہمیت کا حامل ہوتا ہے، کیریبین کرکٹ کی تاریخ ہے کہ وہاں کھیلوں کی بہترین سہولیات اور حوصلہ افزائی کرنے والے شائقین کی موجودگی تمام کھلاڑیوں کو اپنی صلاحیتوں کے بھرپور اظہار کی ترغیب دیتی ہے۔ کرکٹ ویسٹ انڈیزکی مشاورت اور آئی سی سی ٹی ٹونٹی کرکٹ ورلڈکپ کی آمد کے پیش نظر ہم نے ابتدائی طور پر سیریز میں شامل 1 ٹیسٹ میچ کی جگہ 2 ٹی ٹونٹی انٹرنیشنل میچز شامل کرنے پر اتفاق کیا ہے، اس اقدام سے دونوں ٹیموں کے کھلاڑیوں کو مزید بہتر انداز سے میگا ایونٹ کی تیاری کرنے میں معاونت ملے گی۔ ویسٹ انڈیز کیخلاف یہ سیریز پاکستان کرکٹ کے ایکشن پیک سیزن کا حصہ ہے،آئندہ 8 ماہ کے دوران اس ایکشن پیک سیزن میں پاکستان کو نیوزی لینڈ ، انگلینڈ ، ویسٹ انڈیز اور آسٹریلیا کی میزبانی کرنے کے علاوہ انگلینڈ ، افغانستان اور بنگلہ دیش کیخلاف اوئے سیریزبھی کھیلنی ہے،اسی دوران قومی ٹیم آئی سی سی ٹی ٹونٹی ورلڈ کپ میں بھی شرکت کرے گی۔ آئندہ آنے والی ہر سیریز ہمارے لیے بہت اہم ہے کیونکہ ہم 2023 ء تک اپنی ٹیم کو ہر طرز کی کرکٹ میں ٹاپ تھری پوزیشنز پر دیکھنا چاہتے ہیں۔پاکستان نے آخری مرتبہ2017 ء میں ویسٹ انڈیز کا دورہ کیا تھا ، جہاں مہمان ٹیم نے پہلی مرتبہ 1-2 سے ٹیسٹ سیریز جیت کراس وقت ٹیم میں موجود سینئر ترین کھلاڑیوں مصباح الحق اور یونس خان کو بہترین فیئرویل دی تھی۔دلچسپ امر یہ ہے کہ وہ دونوں کھلاڑی اب بحیثیت کوچ قومی ٹیم کے ہمراہ ویسٹ انڈیز کا دورہ کریں گے۔مصباح الحق بطور ہیڈ کوچ اور یونس خان بطور بیٹنگ کوچ قومی سکواڈ کا حصہ ہوں گے۔کیریبئن سرزمین پر یہ دونوں ٹیموں کے درمیان مجموعی طور پر نویں ٹیسٹ سیریز ہوگی،جہاں 4 مرتبہ کامیابی میزبان ٹیم اورایک مرتبہ مہمان ٹیم کے نام رہی۔سبینا پارک میں دونوں ٹیموں کا ٹیسٹ ریکارڈ 2-2 سے برابر ہے۔ یہاں کھیلے گئے چار ٹیسٹ میچز میں سے 2 میں پاکستان اور 2 میں ویسٹ انڈیز نے فتح اپنے نام کی۔ ویسٹ انڈیز میں کھیلی گئی اب تک تین ٹی ٹونٹی سیریز میں پاکستان کو 1-2 سے سبقت حاصل ہے۔شیڈول:21 جولائی:قومی سکواڈ بارباڈوس پہنچے گا۔27 جولائی: پہلا ٹی ٹونٹی انٹرنیشنل میچ بمقام بارباڈوس۔28 جولائی: دوسرا ٹی ٹونٹی انٹرنیشنل میچ بمقام بارباڈوس۔31 جولائی: تیسرا ٹی ٹونٹی انٹرنیشنل میچ بمقام گیانا۔یکم اگست: چوتھا ٹی ٹونٹی انٹرنیشنل میچ بمقام گیانا۔3 اگست: پانچواں ٹی ٹونٹی انٹرنیشنل میچ بمقام گیانا۔6تا7 اگست: 2 روزہ پریکٹس میچ بمقام گیانا۔12 تا 16اگست: پہلا ٹیسٹ میچ بمقام جمیکا۔20 تا24 اگست: دوسرا ٹیسٹ میچ بمقام جمیکا۔25 اگست:قومی سکواڈ کی وطن واپسی۔