کراچی (اسٹاف رپورٹر) پاکستان پیپلز پارٹی کے چیئرمین اور وفاقی وزیر خارجہ بلاول بھٹو زرداری کا استقبال کرنے پورا کراچی امڈ آیا ۔ چیئرمین بلاول بھٹو زرداری کے جہاز کی لینڈنگ سے قبل ہی لاکھوں کی تعداد میں جیالے اور شہری ایئرپورٹ پہنچ گئے۔ ایئرپورٹ سمیت گردونواح میں ویلکم بلاول ویلکم، جیئے بھٹو اور زندہ ہے بی بی زندہ ہے کے نعروں کی گونج شروع ہوگئی۔ جیالوں اور شہریوں نے ملک کے سب سے کم عمر وزیرِخارجہ کی تصاویر والے استقبالی پوسٹرز اٹھا رکھے ہیں۔ پاکستان پیپلز پارٹی  چیئرمین کا فقید المثال استقبال کرنے کے لیئے ٹھٹھہ اور حیدرآباد سمیت مختلف علاقوں سے بھی جیالے ایئرپورٹ پہنچ چکے ہیں۔ پیپلز پارٹی سندھ کی قیادت، وزیراعلی سندھ سید مراد علی شاہ ، ارکان اسمبلی اور دیگر رہنما بھی ایئرپورٹ پر موجود ہیں۔