وفاقی حکومت پاکستان انفارمیشن کمیشن کو فوری طور پر مکمل کرے،ایس ایس ڈی او 

اسلام آباد (نمائندہ نوائے وقت)ایس ایس ڈی او نے وفاقی حکومت پر زور دیا کہ وہ پاکستان انفارمیشن کمیشن کو فوری طور پر مکمل کرے کیونکہ 700 سے زائد اپیلیں زیر التوا ہیں۔سسٹین ایبل سوشل ڈویلپمنٹ آرگنائزیشن نے وفاقی حکومت پر زور دیا کہ وہ پاکستان انفار میشن کمیشن کی خالی چیف انفارمیشن کمشنر اور انفارمیشن کمشنر کی سیٹیں جلد پر کرے تاکہ اداارہ اپنی آئینی ذمہ داریاں پوری کر سکے۔چیف انفارمیشن کمشنر اور 2 انفارمیشن کمشنر کمیشن تشکیل دیتے ہیں اور اپیلوں کو سننے کے ذمہ دار ہیں۔ چیف انفارمیشن کمشنر محمد اعظم اور  انفارمیشن کمشنر فواد ملک 07 نومبر 2022 کو ریٹائر ہو گئے جبکہ دوسرے انفارمیشن کمشنر زاہد عبداللہ 17 نومبر 2022 کو ریٹائر ہو جائیں گے۔ کمیشن میں اس وقت 700 سے زائد اپیلیں زیر التوا ہیں اور ان کمشنروں کی ریٹائرمنٹ کے ساتھ ہی یہ اپیلیں نئے انفارمیشن کمشنروں کی بھرتی تک زیر التوا رہیں گی۔ سبکدوش ہونے والے چیف انفارمیشن کمیشن نے سیکرٹری اطلاعات و نشریات کو 7 ستمبر 2022 کو بھرتی کا عمل شروع کرنے کیلئے خط لکھا کیونکہ اسامیوں کو پورا کرنے میں کم از کم 2 ماہ لگ سکتے ہیں لیکن ابھی تک یہ عمل شروع نہیں کیا گیا۔پاکستان انفارمیشن کمیشن ایک خودمختار ادارہ ہے، جو معلومات تک رسائی کے حق ایکٹ 2017 کے سیکشن 18 کے تحت قائم کیا گیا ہے تاکہ اس ایکٹ پر عمل درآمد کو یقینی بنایا جا سکے۔ اس کا کردار طریقہ کار وضع کرنے کا ہے تاکہ پاکستان کے شہری عوامی اہمیت کے معاملات میں معلومات تک رسائی کے اپنے آئینی حق کا استعمال کر سکیں۔ اس سلسلے میں، یہ عوامی آگاہی کے لیے اقدامات کرتا ہے ، وفاقی عوامی اداروں کو قانون کی تعمیل میں مدد کرتا ہے، پبلک انفارمیشن افسران کو تربیت دیتا ہے، ان کی کارکردگی پر نظر رکھتا ہے، شکایات کا فیصلہ کرتا ہے اور رسائی کے حق کی دفعات کی تعمیل میں ناکام رہنے والوں کے خلاف کارروائی کرتا ہے۔ایس ایس ڈی او پاکستان انفارمیشن کمیشن کے ساتھ مل کر کام کر رہا ہے تاکہ آر ٹی آئی کے مثر استعمال کے بارے میں آگاہی بڑھائی جا سکے اور عوامی اہمیت کے مختلف مسائل پر معلومات اکٹھی کرنے کے لیے اس قانون کو فعال طور پر استعمال کیا جا سکے۔ ایس ایس ڈی او نے آر ٹی آئی پر مختلف اسٹیک ہولڈرز کے لیے مختلف ٹریننگ سیشنز کا بھی اہتمام کیا۔ایس ایس ڈی او کے ایگزیکٹو ڈائریکٹر سید کوثر عباس نے کہا کہ آرٹیکل 19 اے کے تحت معلومات تک رسائی ہر شہری کا بنیادی آئینی حق ہے اور پاکستان انفارمیشن کمیشن میں خالی آسامیوں کی وجہ سے اپیلیں زیر التوا رہیں گی اور یہ شہریوں کے بنیادی آئینی حقوق کی خلاف ورزی ہوگی۔ . انہوں نے حکومت پر زور دیا کہ پی آئی سی میں خالی نشستوں کو پر کرنے کا عمل فوری طور پر شروع کیا جائے۔
 سید کوثر عباس