گوجرانوالہ (نمائندہ خصوصی)گوجرانوالہ الیکٹرک پاور کمپنی(گیپکو) کے چیف ایگزیکٹو محمد ایوب نے کہا ہے کہ نبی آخرالزامان ؐ کی رحمت تمام جہانوں اور ادوار پر محیط اور زمان و مکان کی قیود سے ماوراء ہے، وجہ کائنات حضرت محمدؐ سے والہانہ محبت کامل ایمان کی نشانی ہے۔ انہوں نے کہا کہ رسول کریم ؐ نے بنی نوع انسانیت کو جہالت کے اندھیروں سے نکال کر قابل توقیر مقام سے روشناس کرایا،محسن کائنات حضرت محمد ؐ کے اسوہ حسنہ پر عمل پیرا ہو کر ہر دور کے بحرانوں کا مقابلہ کیا جا سکتا ہے۔ ان خیالات کا اظہار انہوں نے گیپکو ہیڈ کوارٹر میں سیرت النبی ؐ کانفرنس کے حوالے سے تقریب سے خطاب کرتے کیا۔ تقریب سے ممبر بورڈ آف ڈائریکٹرز نور محمد مرزا نے بھی خطاب کیا ۔ اس موقع پر سی ای او جی ایچ سی ایل پرویز اقبال، مظہر نوید، رانا اشتیاق احمد، جلیل الرحمن، آصف ندیم، شاہد نعیم چیمہ، شیخ امان اللہ، امتیاز چیمہ، تنویر حسین ناگرہ، بوٹا گورائیہ، فیصل نفیس،گیپکو آفیسرز و انجینئرز ایسوسی ایشن و یونین عہدیدران،ایکسیئنز، ایس ڈی اوز، افسروں و ملازمین کی کثیر تعدادموجود تھی۔