دوسرا ٹی ٹونٹی: پاکستان آسٹریلیا آج مدمقابل، تینوں فارمیٹ میں ملکی کوچز کے تقرر پر غور

لاہور(سپورٹس رپورٹر) پاکستان اورآسٹریلیا کے مابین ٹی ٹونٹی سیریز کا دوسرا ٹی ٹونٹی میچ آج سڈنی میں کھیلا جائیگا۔ پاکستان میچ کیلئے سڈنی پہنچ گئی۔ میچ   دن ایک بجے شروع ہوگا ۔آسٹریلیا کو سیریز میں ایک صفر کی برتری حاصل ہے۔پاکستان کرکٹ بورڈ نے غیر ملکی ہیڈ کوچز سے چھٹکارہ حاصل کرنے کی حکمت عملی  تبار کرلی ہے ۔ذرائع کے مطابق ریڈبال ہیڈ کوچ جیسن گلیسپی کا معاہدہ قبل ازوقت ختم کر کے فارغ کردیا جائیگا، تینوں فارمیٹ میں پاکستانی ہیڈکوچ کے تقرر پر غور شروع کر دیا گیا ہے، زمبابوے کے دورے میں پاکستانی ہیڈ کوچ کا تقرر کیا جائیگا۔ سپورٹ سٹاف میں بیٹنگ، بائولنگ اور فیلڈنگ کوچ غیر ملکی ہونے کی تجویز پیش کی گئی ہے تاہم جلد زمبابوے اور جنوبی افریقہ کے دورے کیلئے وائٹ بال ہیڈ کوچ کا اعلان کیا جائے گا۔ذرائع کا مزید کہنا ہے کہ غیر ملکی کوچ پی سی بی حکام کو بلیک میل کرتے ہیں، جیسن گلیسپی نے بھی کچھ شرائط منوانے کی کوششیں کیں لیکن پی سی بی نے انکار کر دیا۔