خضدار: نامعلوم افراد کی فائرنگ، قبائلی رہنما مہر اللہ حسنی 3 ساتھیوں سمیت جاں بحق

کوئٹہ، خضدار(نوائے وقت رپورٹ، این این آئی) بلوچستان میں نامعلوم افراد کی فائرنگ سے قبائلی رہنما3 ساتھیوں سمیت جاں بحق ہوگئے۔ ڈپٹی کمشنر خضدار یاسر اقبال دشتی نے بتایا کہ خضدار کی تحصیل وڈھ کے علاقے کراڑو میں نامعلوم افراد کی فائرنگ سے قبائلی رہنما میر مہر اللہ محمد حسنی اپنے 3 ساتھیوں سمیت جاں بحق ہوگئے۔ انہوں نے کہا کہ حب سے تعلق رکھنے والے قبائلی رہنما میر مہر اللہ محمد حسنی کوئٹہ سے حب جا رہے تھے کہ جب ان کی گاڑی کراڑو پہاڑی کے مقام پر پہنچی تو نامعلوم مسلح افراد نے ان کی گاڑی پر فائرنگ کر دی۔ فائرنگ کے نتیجے میں میر مہر اللہ محمد حسنی اور ان کے 3 ساتھی موقع پر جاں بحق ہوگئے۔ واقعے کی اطلاع ملتے ہی سکیورٹی فورسز کی بھاری نفری نے جائے وقوعہ پر پہنچ کر نعشوں کو ہسپتال منتقل کیا۔