کوہاٹ: تھانے پر حملہ، 3 اہلکار زخمی، اسلام آباد، کے پی کے میں 6 دہشتگرد گرفتار 

کوہاٹ؍ اسلام آباد (نامہ نگار+ نوائے وقت رپورٹ)  کوہاٹ میں نا معلوم شر پسندوں کے  تھانہ ملز ایریا پر دستی بم  حملہ میں تین پولیس اہلکار زخمی ہوگئے۔ تفصیلات کے مطابق گزشتہ رات نا معلوم شر پسندوں نے پولیس تھانہ ملز ایریا پر دستی بم  پھینک کر فرار ہوگئے۔ جس سے ایک زوردار دھماکہ ہوا۔ جس کے نتیجے میں تین پولیس اہلکار تھانہ محرر صدیق، ڈی ایف سی صلاح الدین اور کانسٹیبل طاہر معمولی زخمی ہوگئے۔ جنہیں فوری طور پر ہسپتال منتقل کر دیا گیا۔ دریں اثناء انسداد دہشتگردی ونگ اور سی ٹی ڈی نے مشترکہ کارروائی کرکے چھ دہشتگردوں کو گرفتار کر لیا۔ دہشتگرد حساس اداروں پر حملے کرنے کی منصوبہ بندی کر رہے  تھے گرفتار دہشتگردوں کا تعلق الخوارج گروپ سے ہے۔ الخوارج گروپ کے دہشتگرد اسلام آباد اور خیبر پی کے سے گرفتار کئے گئے۔ بھاری مقدار میں بارودی مواد پر برآمد ہوا۔ دہشتگرد نور ولی محسود گروپ سے رابطے میں تھے۔ ترجمان اسلام آباد پولیس نے کہا ہے کہ قومی کاؤنٹر ٹیرارزم ڈیپارٹمنٹ (CTD) اسلام آباد اور خفیہ اداروں نے مشترکہ انٹیلی جنس بیسڈ آپریشن کرکے کالعدم تنظیم کے 3 کارکن اسلام آباد کے نواحی علاقہ سے گرفتار کئے گئے۔