اسلام آباد (نمائندہ خصوصی) پیپلز پارٹی کے چیئرمین بلاول بھٹو زرداری اورپی پی پی کے دیگر رہنماؤں  نے بلدیاتی اداروں کے ضمنی انتخابات میں کراچی سمیت سندھ بھر  میں اپنی جماعت کی کامیابی پر  تشکر کا اظہار کرتے ہوئے اسے پارٹی پر عوام کے  بھرپور اعتماد  و حمایت کا مظہر اور جیالوں کی محنتوں کا ثمر قرار دیا ہے۔  بلاول بھٹو نے ضمنی بلدیاتی انتخابات میں کامیاب ہونے والے تمام پارٹی امیدواروں کو مبارکباد دی اور ان   کارکنان کو خراج تحسین پیش کیا۔ انہوں نے کہا کہ کراچی سمیت سندھ بھر میں ایک بار پھر تیر چل گیا، اور شہید محترمہ بینظیر بھٹو  کے جیالے جیت گئے ہیں۔ انہوں نے مزید کہا کہ  ضمنی بلدیاتی انتخابات کے نتائج سے عیاں ہے کہ عوام نے ایک بار پھر نفرت اور تقسیم کی سیاست کو مسترد کرکے بلاامتیاز عوامی خدمت کو چنا ہے۔  مجھے یقین ہے کہ آپ عوام کے اعتماد پر پورا اتریں گے۔  آپ کو محدود وسائل اور زیادہ مسائل کی صورتحال  کا سامنا ہوگا۔ مرکزی ترجمان  پیپلز پارٹی  شازیہ مری اور شیری رحمن نے کہا کہ  شاندار جیت پر جیالے مبارکباد کے مستحق ہیں ،عوام نے سندھ کے 18 اضلاع میں پاکستان پیپلزپارٹی پر اپنے بھرپور اعتما د کا اظہار کیا۔ سید نیر حسین بخاری   نے   سندھ بلدیاتی اداروں کے ضمنی انتخابات میں  پارٹی کی کامیابی پر ووٹرز کا شکریہ  ادا کیا۔