سری لنکا سے تعلقات کو وسعت دینے کیلئے پرعزم، وزیراعظم، اپیل پر ملک بھر میں نماز استسقاء ادا کی گئی

اسلام آباد؍ لاہور (نوائے وقت رپورٹ+ خصوصی نامہ نگار) وزیراعظم شہباز شریف نے ایکس پر پیغام میں کہا ہے کہ سری لنکا کے صدر انوارا کمارا ڈاسا نائیکے کو پارلیمانی انتخابات میں جیت پر مبارکباد پیش کرتا ہوں۔ ان کی کامیابی سری لنکن عوام کے اعتماد اور بھروسے کا منہ بولتا  ثبوت ہے۔ سری لنکا کے عوام نے ان کے وژن اور قیادت پر اعتماد کا اظہار کیا۔ پاکستان سری لنکا کے ساتھ دیرینہ تعلقات کو مزید وسعت دینے کیلئے پرعزم ہے۔ علاوہ ازیں  وزیراعظم شہباز شریف کی اپیل پر فیصل مسجد اسلام آباد سمیت ملک کی مختلف  مساجد میں بھی نماز استسقاء کا اہتمام کیا گیا۔ وزارت مذہبی امور نے وزیراعظم کی اپیل پر وفاقی اور صوبائی سطح پر نماز استسقاء  کا اہتمام کرنے کی ہدایت کی تھی۔ وزیراعظم پاکستان کی ہدایت پر نماز استسقاء  کے اہتمام کا سرکلر جاری کیا گیا تھا جس میں چاروں صوبوں، گلگت، آزاد کشمیر کے سیکرٹری اوقاف کو عمل درآمد یقینی بنانے کی ہدایت جاری کی گئی تھی۔