اسلام آباد ( شاہد اجمل) اسلام آباد کی احتساب عدالت میں پیشی کے موقع پر میاں نواز شریف مطمئن اور ہشاش بشاش نظر آئے ،ضمنی انتخابات میں مسلم لیگ(ن) کی کامیابی کی خوشی ان کے چہرے سے عیاں تھی ،میڈیا سے گفتگو میں بھی میاں نواز شریف خوش نظر آرہے تھے۔میاں نوازشریف نے گجرات سے مسلم لیگ(ن) کے رکن قومی اسمبلی چوہدری عابد رضا کوٹلہ سے بھی کمرہ عدالت میں خصوصی ملاقات کی اور جہلم سے صوبائی اسمبلی کی نشست کی جیت میں اہم کردار اداکرنے پر چوہدری عابد رضا کی تعریف کی۔کمرہ عدالت میں ضمنی انتخابات میں مسلم لیگ(ن) کی کامیابی موضوع گفتگو رہی میاں نواز شریف نے وہاں پر موجود ن لیگی رہنمائوں کو اس کامیابی پر مبارکباد پیش کی ،لیگی رہنما بھی ضمنی انتخابات کی کامیابی پر خوش نظر آرہے تھے۔میاں نواز شریف سڑک کے ذریعے احتساب عدالت میں پیشی کے لیے اسلام آباد پہنچے ،اس سے پہلے وہ احتساب عدالت میں پیشی کے لیے خصوصی طیارے کے ذریعے اسلام آباد آتے ہیں،احتساب عدالت کے باہر مسلم لیگ(ن) کے رہنما رحمان عباسی کی قیادت میں آنے والے کارکنوں نے میاں نواز شریف کی گاڑی پر پھولوں کی پتیاں پھینکیں اوران کے حق میں نعرے لگائے۔
نواز شریف/ خوشی