اسلام آباد (چوہدری شاہد اجمل) اسلام آباد کی احتساب عدالت میں پیشی کے موقع پر میاں نواز شریف مطمئن اور ہشاش بشاش نظر آئے ،ضمنی انتخابات میں مسلم لیگ(ن) کی کامیابی کی خوشی ان کے چہرے سے عیاں تھی۔ نوازشریف نے گجرات سے مسلم لیگ(ن) کے رکن قومی اسمبلی چوہدری عابد رضا کوٹلہ سے بھی کمرہ عدالت میں خصوصی ملاقات کی اور جہلم سے صوبائی اسمبلی کی نشست کی جیت میں اہم کردار اداکرنے پر چوہدری عابد رضا کی تعریف کی۔کمرہ عدالت میں ضمنی انتخابات میں مسلم لیگ(ن) کی کامیابی موضوع گفتگو رہی میاں نواز شریف نے وہاں پر موجود ن لیگی رہنمائوں کو اس کامیابی پر مبارکباد پیش کی ،لیگی رہنما بھی ضمنی انتخابات کی کامیابی پر خوش نظر آرہے تھے۔ احتساب عدالت کے باہر مسلم لیگ(ن) کے رہنما رحمان عباسی کی قیادت میں آنے والے کارکنوں نے نواز شریف کی گاڑی پر پھولوں کی پتیاں پھینکیں اوران کے حق میں نعرے لگائے۔عدالت میں پیشی کے موقع پر مسلم لیگ کے رہنماء چوہدری عابد رضا ،سینیٹرچوہدری تنویر،انجم عقیل خان،چوہدری مشتاق ،بیرسٹر ظفراللہ ،اقبال ظفر جھگڑا،حاجی شکیل،سینٹر سلیم ضیاء اورطاہرہ اورنگزیب بھی موجود تھیں۔